Oral qalasynda 600-deı nysan abattandyrý tizimine engizilmegen
ORAL. KAZINFORM — Memleket basshysynyń «Zań men tártip» ıdeologııasyn ornyqtyrý jónindegi tapsyrmasyna sáıkes Batys Qazaqstan oblysynda «Qaýipsiz óńir» jobasy júzege asyrylyp jatyr.
BQO prokýrory Nurbek Ulasbekulynyń osy máselege arnalǵan jıynda málim etkenindeı, joba qolǵa alynǵan ótken jylǵy naýryz aıynan beri birqatar is-shara júzege asyryldy.
Atap aıtqanda, 42 kóshe men 24 aýla aýmaǵy jaryqtandyrylyp, jasandy ıntellekt elementterimen qamtylǵan beınebaqylaý kameralary ornatyldy.
— Іs-sharalar óńirde krımınogendik ahýaldy turaqtandyrýǵa múmkindik berdi. Ótken jyldyń birinshi toqsanynyń qorytyndysy boıynsha oblys ortalyǵynda jalpy qylmys deńgeıi 2 paıyzǵa kemigen edi. Al jyl sońynda bul kórsetkishtiń 8 paıyzǵa deıin azaıǵany tirkeldi. Qoǵamdyq oryndarda jasalatyn múliktik qylmystar, buzaqylyqtar sany qysqardy, nátıjesinde qala qaýipsiz bola tústi. Sondyqtan «Qaýipsiz qala» jobasyn jalǵastyrý týraly sheshim qabyldandy, — dedi N.Ulasbekuly.
Onyń aıtýynsha, birqatar problemalyq másele zerttelgen. Mysaly, jobanyń qalanyń barlyq qaýipti aımaqtaryn qamtymaǵany anyqtaldy. Buǵan jol bermeý úshin jobaǵa ózgerister engizildi.
— Kúni búgin qala boıynsha abattandyrý jónindegi is-sharalar josparyna engizilmegen 600-deı nysan (ǵımarattar, skverler, jol, trotýarlar, jaryqtandyrý jáne basqa) bar. Sondyqtan qala ákimdigine tizimdi qaıta qarap, olardy renovatsııa nysandary qataryna engizý usynylady. Bul rette bıýdjettik ótinimder joldap, bıylǵy jyly bıýdjetti naqtylaǵan kezde bekitý kerek, — dedi oblys prokýrory.
Eske sala keteıik, budan buryn BQO-da qaldyq oryndaryn baqylamaǵan aýdan ákiminiń orynbasary sógis alǵanyn jazǵan edik.
