Oral qalasynda 60 saýda dúńgirshegi zańsyz qoıylǵan

ORAL. KAZINFORM – Oral qalasynda zańsyz ornatylǵan shamamen 60 saýda dúńgirshegi anyqtaldy. 

Oral ákiminiń tapsyrmasymen qalalyq jer qatynastary bólimi, kásipkerlik jáne aýyl sharýashylyǵy bólimi polıtsııa basqarmasymen birlesip kóshede zańsyz qoıylǵan saýda dúńgirshekterin alý jumystaryn júrgizip jatyr. Ol úshin arnaıy jumys toby quryldy.

Qala ákimdiginen alynǵan málimetke qaraǵanda, búginge deıin reıd jumysymen osyndaı 34 saýda dúńgirshegi qamtyldy. Barlyq dúńgirshek ıelerine ruqsat qujattaryn usyný týraly habarlamalar taratyldy. Qujattary túgel bolmaǵan jaǵdaıda qalalyq jer qatynastary bólimi tarapynan jer resýrstaryn basqarý departamentine hat joldanady. Ákimshilik jaýapkershilikke tartylyp, sotqa talap-aryz beriledi. 

«Qazirgi tańda zańsyz qoıylǵan 16 dúńgirshek alynyp tastaldy. Atap aıtqanda, Ábilqaıyr han dańǵyly, Tsıolkovskıı aıaldamasynda - 5, «City center» aýdanynda - 2, «Mereı» bazary aýdanynda - 2, «Jeńis» shaǵynaýdany, № 21 úı aýdanynda - 1 , Táýelsizdik kóshesi boıynda - 1, Qurmanǵazy kóshesi, L.Tolstoı aıaldamasy aýdanynda - 1, Á.Moldaǵulova kóshesi, «Raýan» kesheni aldynda - 2, temir jol vokzaly aýdanynda - 2 dúńgirshek. Sonymen qatar «Báıterek» bazary mańynda ornalasqan 2 dúńgirshek boıynsha materıal sotqa joldandy. Bul baǵyttaǵy jumys odan ary jalǵasady», - dep habarlady vedomstvodan. 

Eske sala keteıik, budan buryn qala kósheleri durys tazalanbaýyna baılanysty Oral ákimdigi jaýap bergenin jazǵan bolatynbyz.