Oral qalasynda 550 oryndyq oblystyq kópbeıindi aýrýhana salynbaq

ORAL. KAZINFORM — Oral qalasyndaǵy «Aqjaıyq» shaǵynaýdanynda kópqabatty úılermen qatar áleýmettik nysandar boı kóteredi.

BQO qurylys basqarmasynyń basshysy Nurken Moldashevtiń málim etkenindeı, buǵan deıin 5 kópqabatty úı qurylysy aıaqtalyp, 390 páter kezekte turǵandarǵa berildi.

Nurken Edilulynyń sózine qaraǵanda, 150 oryndyq «Aqjaıyq» ońaltý ortalyǵy jumys istep jatyr. 

— Qýattylyǵy táýligine 20 myń tekshe metr káriz-sorǵy stantsııasy paıdalanýǵa berildi. Sondaı-aq shaǵynaýdandy sýmen qamtý úshin 7 800 tekshe metr sorǵy stantsııasy salynýda. 370 páterlik taǵy úsh kópqabatty úı salynyp bitip, qazirgi kezde aýla aýmaqtaryn, kvartalishilik kireberisterdi abattandyrý jumystary júrgizilýde. 2025 jyly 120 páterlik eki úıdiń, oǵan qosa 460 páterlik eki toǵyz qabatty úıdiń qurylysy bastalady, — dedi N.Moldashev.

Onyń sózine qaraǵanda, jańadan qonystanǵandardan balkonnyń ashyq qalýyna baılanysty shaǵym túsken bolatyn. Qazirgi tańda ony jabý oılastyrylýda. 

— «Aqjaıyq» shaǵynaýdanynda 1 500 mektep salý kózdelýde. Sonymen qatar 550 oryndyq oblystyq kópbeıindi aýrýhana qurylysynyń jobasy jasalýda. Sonyń bólek korpýsynda 200 tósektik oblystyq kardıologııalyq ortalyq ornalasatyn bolady. 200 oryndyq perınataldyq ortalyq salý da josparlanyp otyr, — dedi basqarma basshysy.

Basqarma málimetine sáıkes «Aýylda densaýlyq saqtaýdy jańǵyrtý» ulttyq jobasy aıasynda Batys Qazaqstan oblysynda 14 medıtsınalyq nysandy iske qosý josparlansa, sonyń 13-i alty aýdanda iske qosyldy. Tamyz aıynyń sońyna deıin Syrym aýdanyndaǵy medıtsınalyq nysannyń qurylysy aıaqtalady. Budan basqa, Kaztalov jáne Bórli aýdandarynda aýdanaralyq kópbeıindi aýrýhanalaryna japsarjaı qurylysy bastalady. 

Eske sala keteıik, budan buryn Oralda «Aqjaıyq» shaǵynaýdany qalaı salynyp jatqanyn jazǵan edik.