Oral qalasynda 40 alkomarkettiń 15-i lıtsenzııasynan aıyryldy

ORAL. KAZINFORM — Batys Qazaqstan oblysynda bıyl otbasylyq qatynas salasyndaǵy qylmystardyń 70 paıyzy (1 256) qoǵamdyq oryndarda jáne 22 paıyzy (266) adamdardyń mas kúıinde jasalǵan.

Bul týraly tyıym salynǵan ýaqytta alkogoldik ónimderdiń satylýyna jol bermeý jáne onyń aldyn alý maqsatynda oblys prokýratýrasynda ótken jıynda aıtyldy. 

Sonyń barysynda «Yandex», «Volt» jáne «InDrive» ınternet qosymshalary basshylarymen túnde alkogoldik ónimderdi jetkizýge jáne satýǵa tyıym salý týraly memorandýmǵa qol qoıyldy.

BQO prokýrorynyń birinshi orynbasary Dáýren Omarǵalıevtiń málim etkenindeı, zańnamamen túngi ýaqytta alkogoldik ónimderdi satýǵa tikeleı tyıym salynǵany belgili. Tek meıramhana, bar jáne kafeler sata alady. 

— Oral qalasynda túngi ýaqytta alkogoldik ónimderdi satatyn jáne jetkizetin 40 alkomarket bar. Osyǵan baılanysty bıylǵy 19 qarashada oblys prokýratýrasynda ótkizilgen zańdylyq pen tártipti qamtamasyz etý boıynsha úılestirý keńesiniń sheshimine sáıkes prokýratýra men polıtsııa birlesip reıdtik is-sharalar ótkizdi. Sonyń nátıjesinde oblystyq ortalyǵyndaǵy 40 alkomarkettiń 15-i (38 paıyzy) lıtsenzııasynan 1 aıǵa aıyryla otyryp, ákimshilik jaýapkershilikke tartyldy. Qazirgi tańda reıdtik is-sharalar jalǵasýda, — dedi D. Omarǵalıev.

Onyń aıtýynsha, qabyldanǵan sharalar sońǵy aıda mas kúıinde jasalǵan qylmystardyń 22 paıyzdan 17 paıyzǵa deıin tómendeýine áser etti. 

— Mundaı memorandýmdar qylmystyń aldyn alýǵa jáne ony azaıtýǵa oń yqpalyn tıgizedi, — dedi BQO prokýrorynyń birinshi orynbasary.

Eske sala keteıik, budan buryn Batys Qazaqstan 13 jedel járdem kóliginiń qujatsyz júrgeni anyqtalǵanyn jazǵan bolatynbyz.