Oral qalasynda 4 avtokólik soqtyǵysyp, 5 adam aýrýhanaǵa jetkizildi
ORAL. KAZINFORM – Oral qalasyndaǵy Zachagan kentinde jol-kólik oqıǵasy bolyp, 5 adam jaraqat aldy.
Oqıǵa S.Aıtqulov pen Jáńgir han kósheleriniń qıylysynda 14 qańtar kúni boldy.
Eki júk kóligi men Volkswagen jáne Hyundai Tucson jeńil kólikteri túıisken.
BQO jedel medıtsınalyq járdem stantsııasynyń dırektory Serik Orynbasarovtyń málim etkenindeı, Qus fabrıkasy aýdanynda jol apaty bolǵany jóninde saǵat 12.14-te shaqyrý túsken.
- Jedel járdem brıgadalary zardap shekken 5 adamǵa shuǵyl medıtsınalyq kómek kórsetti. Olar túrli jaraqattarmen oblystyq kópbeıindi aýrýhanaǵa jetkizildi. Bireýi aýrýhanaǵa jatýdan bas tartty, - dedi S.Orynbasarov.
BQO TJ departamenti baspasóz qyzmetiniń naqtylaýynsha, kómekke qutqarýshylar da barǵan.
Olar avtokólikke qysylyp qalǵan eki adamdy alyp shyǵyp, medıtsına qyzmetkerlerine tapsyrǵan.
Qazirgi kezde oqıǵanyń jaı-japsary anyqtalyp jatyr.
Eske sala keteıik, budan buryn BQO-da órt bolǵan jerden eki adamnyń denesi tabylǵanyn jazǵan edik.
