Oral qalasynda 190, Aqsaıda 40 lıftiniń tozyǵy jetken

ORAL. KAZINFORM — Batys Qazaqstan oblysynda barlyǵy 1 175 lıfti bolsa, sonyń 943-i (838 kópqabatty úı) Oral, 232-si (62 úı) Aqsaı qalasynyń úlesine tıedi.

BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Qanat Ómirálıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde Oralda 190 (22,6 paıyzy), Aqsaıda 40 (17,2 paıyzy) lıftiniń paıdalaný merzimi 25 jyldan asyp, tozyǵy jetken.

Qanat Amangeldiulynyń sózine qaraǵanda, sonymen qatar áleýmettik nysandarda Oralda 173 (úsheýiniń tozyǵy jetken, 1,7 paıyz), Aqsaı qalasynda 16 lıfti bar.

Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy aıasynda ótken jyly turǵyn úılerdi kúrdeli jóndeý boıynsha 879,2 mln teńge 26 joba júzege asyryldy. Sonyń ishinde 19-y — shatyrdy, tórteýi — úıdi kúrdeli jóndeý, úsheýi — lıftilerdi aýystyrý.

— Bıyl oblystyq bıýdjettiń naqtylanýy kezinde 16 lıftini jańartýǵa 323,3 mln teńge (Oralda 11 jobaǵa — 245,5 mln, Aqsaıda 5 lıftige — 77,7 mln teńge) qarastyryldy. Nátıjesinde 1 291 adam qaýipsiz jańa lıftini paıdalanatyn bolady. Oǵan qosa Aqsaı qalasynda 5 kópqabatty úıdiń (365 adam) lıftisin aýystyrý úshin aýdandyq bıýdjetten 71,5 mln teńge bólindi, — dedi Q.Ómirálıev.

Onyń aıtýynsha, Oralda ázir turǵan 3 (61,7 mln teńge), Aqsaıda 22 joba respýblıkalyq bıýdjet naqtylanatyn kezde qoldaý tapqan jaǵdaıda júzege asyrylatyn bolady. Sondaı-aq «Oral Qurylys Jóndeý Servıs» JShS lıftilerdi aýystyrý úshin 11 joba boıynsha jobalyq-smetalyq qujattama daıyndap jatyr.

Eske sala keteıik, budan buryn Batys Qazaqstanda turǵyn úı qurylysy qalaı júrgizilip jatqanyn jazǵan bolatynbyz.