Oral qalasynda 13 jasar qyzdy zorlaǵandar sottaldy

ORAL. KAZINFORM – BQO qylmystyq ister jónindegi mamandandyrylǵan aýdanaralyq sotynda R-ǵa, sondaı-aq kámeletke tolmaǵan M., A., N. jáne Q-ǵa qatysty úkim shyqty.

Sottan túsken málimetke qaraǵanda, sottalýshylardyń bárine QR QK 293-baby 4-bóligine (zorlaý, ıaǵnı aldyn ala sóz baılasý arqyly adamdar tobymen jábirlenýshiniń dármensiz kúıin paıdalanyp, jas balaǵa qatysty jynystyq qatynas jasaý) sáıkes aıyp taǵyldy. 

Oǵan qosa A. men N. QR QK 293-baby 2-bóligi 1-tarmaǵy (aldyn ala sóz baılasý arqyly adamdar tobymen buzaqylyq jasaý), Q. QR QK 200-baby 1-bóligi (avtomobıldi urlaý maqsatynsyz aıdap ketý), sondaı-aq 188-baby 3-bóligi 3-tarmaǵy (kólik quralyna zańsyz kirýmen bótenniń múlkin jasalǵan urlyq), A. jáne M. QR QK 188-baby 3-bóligi 3-tarmaǵy (kólik quralyna zańsyz kirýmen adamdar tobynyń aldyn ala sóz baılasýlary arqyly jasalǵan urlyq) boıynsha aıyptaldy. Sonymen qatar A. jábirlenýshiniń dármensiz kúıin paıdalanyp, jas qyzǵa qatysty seksýaldyq sıpattaǵy ózge de áreketterdi (QK-niń 121-baby 4-bóligi) jasaǵan.

Sotta anyqtalǵanyndaı, ótken jyly 11 mamyrda saýda úıinde temeki tartyp kele jatqan N. ózine eskertý jasaǵany úshin V-ǵa A. ekeýi dene jaraqattaryn salǵan. 

23 mamyrda Q. «Lada» avtokóligin urlaý maqsatynsyz zańsyz ıelenip, kólik ıesine 725 myń teńge mólsherinde materıaldyq zalal keltirgen. Alty kúnnen keıin ol «Hyundai” markaly avtokóligine zańsyz kirip, 1 mln astam teńgeni jymqyrǵan. 

10 maýsym kúni A. men M. «Folksvagen»» avtokóligine zańsyz kirip, 130 myń teńge turatyn uıaly telefondy urlaǵan. 

11 maýsym kúni sottalýshylar jaldamaly páterde jas qyzdy zorlaǵan. 

Sot úkim shyǵarǵan kezde sottalýshylardyń jasaǵan qylmystarynyń sıpaty men qoǵamǵa qaýiptilik dárejesin, aýyrlatatyn mán-jáılardyń joǵyn, M., A., N. jáne Q.-nyń qylmystardy jasaǵan kezde olardyń kámeletke tolmaǵanyn eskerdi.

Sot úkimimen R. 20 jyl merzimge bas bostandyǵynan aıyryldy. 

Kámeletke tolmaǵan M. men N.-ǵa qylmystardyń jıyntyǵy boıynsha túpkilikti 7 jyl 6 aıǵa, A. jáne Q.-ǵa 8 jylǵa bas bostandyǵynan aıyrý jazasy taǵaıyndaldy.

Úkim zańdy kúshine engen joq.

Eske sala keteıik, budan buryn Oralda tórt jasóspirimniń 13 jasar qyzdy zorlaǵanyn jazǵan bolatynbyz.

Sondaı-aq Oralda 13 jasar qyzdy zorlady degen kúdikpen taǵy bir adam ustaldy.