Oral qalasynda 10 evakýatsııalyq pýnktte 2 400-den astam adam ornalasqan
ORAL. KAZINFORM — Oral qalasynda qazirgi tańda 10 evakýatsııalyq pýnkt jumys jasaıdy. Onda 2 403 adam ornalasqan.
Oral qalasy ákiminiń orynbasary Arsen Ǵubashevtiń málim etkenindeı, adamdarǵa qolaıly jaǵdaı jasaý maqsatynda oqý oryndarynyń 7 jataqhanasynda evakýatsııalyq pýnktter jasaqtalǵan. Sondaı-aq turǵyndardy kóshirýge yńǵaıly bolýy úshin evakýatsııalyq pýnktterge múmkindiginshe sý basý qaýpi bar saıajaılarǵa jaqyn oryndar tańdaldy.
Arsen Zınnatulynyń sózine qaraǵanda, evakýatsııalyq pýnkttegi turǵyndar úsh mezgil tamaq jáne qajetti gıgıenalyq zattarmen qamtamasyz etilgen. Ár evakopýnktte jergilikti polıtsııa qyzmeti, sanıtarlyq-epıdemıologııalyq baqylaý basqarmasy jáne qaladaǵy emhanalardyń qyzmetkerlerinen kezekshilik qoıyldy.
«Evakýatsııalyq pýnktke ornalastyrylǵan mektep jasyndaǵy balalardyń bilim alýy offlaın formatqa aýysýyna baılanysty mektepke deıin tasymal uıymdastyryldy. Sondaı-aq mektep jasyna deıingi balalarǵa evakýapýnktterde shaǵyn ortalyqtar bar. Al jalpy balalardyń bos ýaqytyn tıimdi uıymdastyrý maqsatynda qaladaǵy komıýnıtı ortalyqtary, aýla klýbtary jáne mádenıet úıleriniń qyzmetkerleri ártúrli baǵytta oıyndar, sheberlik jáne sergitý saǵattaryn turaqty túrde uıymdastyrýda», - deıdi A.Ǵubashev.
Oraldaǵy evakýatsııalyq pýnktter myna mekenjaılarda oryn tepken:
1. M.Ótemisov atyndaǵy BQÝ №3 jataqhanasy (N.Nazarbaev dańǵyly 218/2),
2. M.Ótemisov atyndaǵy BQÝ №1 jataqhanasy (Stýdent kóshesi 1 B),
3. Jáńgir han atyndaǵy BQATÝ jataqhanasy (Jáńgir han kóshesi 49),
4. Servıs jáne jańa tehnologııalar kolledjiniń jataqhanasy (Jambyl kóshesi 38/6),
5. J.Dosmuhamedov atyndaǵy joǵary pedagogıkalyq kolledjiniń jataqhanasy (N.Nazarbaev dańǵyly 173),
6. Oral «Servıs» tehnologııalyq kolledjiniń jataqhanasy (Tsıolkovskıı kóshesi 2),
7. A.Imanov atyndaǵy jol-kólik kolledjiniń jataqhanasy (A.Imanov kóshesi 39),
8. OJShSM sport zaly (Á.Áıtıev kóshesi 72 A),
9. «Oral» sport klýby (Derkól kenti, V.Dal kóshesi 7/3).
«Barlyq evakýatsııalyq pýnktterden arnaıy sanattar boıynsha (kópbalaly otbasylar, jańadan dúnıege kelgen náresteleri bar analar, múgedektigi bar adamdar) anyqtadyq. Osy topqa jatatyn turǵyndarǵa kómektesý maqsatynda tizimdi qalamyzdaǵy kásipkerlerge usynatyn bolamyz. Qazirgi ýaqytta evakýatsııalyq pýknt jasaqtaý úshin rezervte 25 mektep bar. Onda 3000-daı oryn daıyn», - dedi qala ákiminiń orynbasary.
Eske sala keteıik, budan buryn Jaıyq ózenindegi sý deńgeıi Taıpaq aýyly tusynda 10 santımetrge kóterilgenin jazǵan bolatynbyz.
