Oral qalasynan Taılandqa jańa reıs ashyldy
Oral qalasynan Taılandqa jańa reıs ashyldy, dep habarlaıdy Kazinform.
«Oral halyqaralyq áýejaıy» JShS baspasóz qyzmetinen málim etkendeı, endi Oral qalasynan Tarazda aralyq aıaldamamen Taılandqa ushýǵa bolady.
Reıster qysqy navıgatsııanyń barlyq kezeńine jarııalandy.
Eń tanymal kýrorttardyń biri Phýketke ushýdy Scat airlines áýe kompanııasy júzege asyrady. Aralǵa 10 kúnde bir ret 189 týrıske arnalǵan Boeing 737 áýe kemelerimen barýǵa bolady.
«Oral halyqaralyq áýejaıy» JShS bas dırektory Rýstam Bektemirovtiń atap ótkenindeı, jańa reıs Oral men kórshi qala turǵyndaryna eń tanymal týrıstik baǵyttardyń biri — Phýket aralyna ońaı jáne yńǵaıly jetýge múmkindik beredi.
«Bul — bizdiń áýejaıdyń marshrýttyq jelisin keńeıtýdegi kezekti qadam, ol jolaýshylarymyzǵa demalý úshin jańa múmkindikterge jol ashady», — dedi R.Bektemirov.
Osylaısha, Mánshúk Mámetova atyndaǵy halyqaralyq áýejaı ushý geografııasyn keńeıtti.
Buǵan deıin bıylǵy sáýir aıynan bastap taǵy bir tanymal kýrort — Sharm-el-Sheıhke reıs ashylǵan edi.
Oǵan Scat áýe kompanııasynyń ushaǵy ár 10 kún saıyn qatynaıdy.
Eske sala keteıik, budan buryn Oral áýejaıynda eki birdeı ushaqtyń keshigip ushqanyn jazǵan bolatynbyz.
