Oral qalasyna keletin ushaqtar keshigip jatyr
Búgin Oral qalasyna keletin ushaqtar keshigip jatyr, dep habarlaıdy Kazinform.
«Oral halyqaralyq áýejaıy» JShS baspasóz hatshysy Aınagúl Saqposynovanyń aıtýynsha, Atyraýdan keletin reıs jergilikti saǵat 12.00-de kelýi kerek edi.
«Qazirgi kezde ushaq tehnıkalyq sebepterge baılanysty keshigip jatqanyn habarlady. Shamamen saǵat 17.00-de Oralǵa kelýi josparlanyp otyr. Sol sekildi almatylyq reıs saǵat 11.00-diń ornyna 13.00-de keletin boldy», — deıdi A.Saqposynova.
Eske sala keteıik, budan buryn Oral qalasynan Astanaǵa qatynaıtyn ushaqtyń ushpaı qalǵanyn jazǵan bolatynbyz.
Bul reıs búgin qatynaıtyn boldy.
«Tehnıkalyq sebepterge baılanysty áýe kemesi aýystyryldy. Keshegi Air Astana-nyń ushaǵy ázirshe jóndelmeıdi dedi. Búgin Astanadan Fly Arystan-nyń ushaǵy ushyp keldi. Biraq ishinde Air Astana qyzmetkerleri qyzmet kórsetýde. Endi osy ushaqpen ushqaly jatyrmyz», — dedi Saltanat esimdi jolaýshy.
