Oral qalasy jylytý maýsymyn apatsyz ótkize ala ma
ORAL. KAZINFORM — Oral qalasynda jylytý maýsymy bastalyp, áleýmettik mekemeler men úılerge jylý berildi. Aldaǵy qys shahar úshin qalaı ótpekshi, qaýip bar ma, osyǵan baılanysty Kazinform tilshisi máseleni zerdelep kórdi.
60 jyl buryn salynǵan bý qazandyǵy ábden tozyp tur
Qoǵam belsendisi Muhtar Ótesov pen BQO qoǵamdyq keńesiniń múshesi, zańger Baýyrjan Ahmetjannyń málim etkenindeı, qalany jylýmen qamtıtyn «Jaıyqjylýqýat» AQ-ǵa táýelsiz sarapshy uıym tekserý júrgizgen.
Baýyrjan Ahmetjannyń sózine qaraǵanda, bıylǵy 27 sáýirde «Jaıyqjylýqýat» AQ men «JSM Ekspert» JShS shart jasasqan.
Quny 2 mln teńge bolatyn sharttyń máni — qubyrlardy, jabdyqtardy tehnıkalyq tekserýden ótkizý. Buǵan 1965 jyly salynǵan № 5 bý qazandyǵy, týrbına tsehy, qazandyq tsehy kiredi.
— Tehnıkalyq tekserý kezinde anyqtalǵandaı, bý qazandyǵy korpýsynyń jaǵdaıy nashar, korrozııa deńgeıi óte joǵary, temir shvellerler shirigen. Qulaý qaýpi bolýy múmkin. Klapandary sý jiberip tur, jylý ızolıatsııasy tolyq emes, durys qaptalmaǵan, jylý joǵaltý qaýpi bar. Avtomatıka, elektr jabdyqtary durys qaptalmaǵan, turbalardyń dánekerlegen jerleri sapasyz, bý qazandyǵynyń korpýsynda jaryqtar bar. Mine, táýelsiz sarapshy osyndaı qorytyndy berip, shuǵyl jóndeý qajet ekenin aıtqan, — deıdi B.Ahmetjan.
Onyń aıtýynsha, kórsetilgen aqaýlar 10 kún ishinde jóndelýi qajet bolǵan.
Alaıda 23 qyrkúıek kúni táýelsiz sarapshy kelgen kezde Oral jylý-qýat ortalyǵynda № 5 bý qazandyǵy boıynsha eshteńe jasalmaǵan bolyp shyqty.
— Oral qalasynda 400 myńǵa jýyq halyq turady. Qalany jylýmen «Jaıyqjylýqýat» AQ qamtamasyz etetin bolsa, buǵan Oral qalasy ákimdigi men oblystyq energetıka jáne turǵyn úı-kommýnaldyq sharýashylyq basqarmasy da jaýapty. Sondyqtan jylytý maýsymy aldynda TJ departamenti, basqa da múddeli uıymdardyń qatysýymen komıssııa qurylyp, akt jasalyp, aldyn ala qamdanýy tıis edi. Salynǵanyna 60 jyl ótken, ábden tozyp turǵan bý qazandyǵy jarylyp, Ekibastuzdaǵydaı apatty jaǵdaı bolmasyna kim kepil? — deıdi qoǵam belsendileri.
Basqarma basshysy ne deıdi?
BQO energetıka jáne turǵyn úı-kommýnaldyq sharýashylyq basqarmasynyń basshysy Beıimbet Mýsınniń naqtylaýynsha, qala tutynýshylary «Jaıyqjylýqýat» AQ-nyń sý qyzdyrǵysh qazandary arqyly jylýmen qamtamasyz etiledi. Bul qazandyqtardan beriletin jylý energııasy — qala úshin negizgi jylý kózi.
Onyń túsindirýinshe, energetıkalyq qazandarda bý týrbınalary arqyly elektr energııasy óndiriledi. Bul qazandyqtardyń jumysy jylý berý protsesine keri áser etpeıdi, óıtkeni jylý energııasy turǵyndarǵa sý qyzdyrǵysh qazandyqtardan beriledi.
— «Jaıyqjylýqýat» AQ ornalasqan energetıkalyq qazandardyń parktik resýrsy, ıaǵnı zaýyt-óndirýshi belgilegen paıdalaný merzimi tolyqtaı taýsylǵan. Búgingi tańda bul qazandar 55 jyldan astam ýaqyt boıy paıdalanylyp keledi. Soǵan qaramastan, olar turaqty tehnıkalyq qyzmet kórsetýdiń jáne júıeli jóndeý jumystarynyń arqasynda jumys qabiletin saqtap otyr. 2025 jylǵy qysqy maýsymǵa daıyndyq aıasynda № 2 energetıkalyq qazandyǵynda býqyzdyrǵysh tútikter tolyqtaı aýystyryldy. Sonymen qatar № 11 sý qyzdyrǵysh qazandyǵynyń ekrandyq qubyrlary jańartyldy. Júrgizilgen jóndeý jumysy jylý kózderiniń turaqty ári qaýipsiz jumysyn qamtamasyz etedi, — deıdi B.Mýsın.
Oǵan qosa basqarma málimeti boıynsha energetıkalyq qazandyqtardy jańartý maqsatynda 3 qazandyqqa jobalyq-smetalyq qujattama jasaqtaý bastalǵan. Sodan soń memlekettik saraptamadan ótkizilmekshi.
JSQ jasaqtalǵannan keıin qarajat suraý úshin respýblıkalyq bıýdjetke tıisti ótinim joldanady. Sáıkesinshe respýblıkalyq bıýdjetten qoldaý tabylǵan jaǵdaıda qaıta jańartý jumystary qolǵa alynbaqshy.
Jylý qubyrlaryndaǵy jaǵdaı neshik?
Basqarma basshysy Beıimbet Mýsınniń málimdeýinshe, jylytý maýsymyna daıyndyq aıasynda «Jaıyqjylýqýat» AQ tarapynan barlyq josparlanǵan jumystar tolyǵymen oryndalǵan.
Atap aıtqanda, kásiporynnyń óz qarajaty esebinen qala ishindegi 5,5 km jylý jelilerine kúrdeli jáne aǵymdaǵy jóndeý júrgizildi. Bul jumystar aıasynda tozyǵy jetken qubyrlar jańartylyp, jylý oqshaýlaý jasalyp, tıisti armatýra aýystyryldy.
Sonymen qatar Qazaqstan Respýblıkasy Úkimetiniń rezervinen bólingen qarajat esebinen 3,9 km № 2 jylý magıstraliniń rekonstrýktsııasy tolyǵymen aıaqtaldy.
Bul joba bıylǵy sáýir aıynda bastalyp, búginde 100 paıyz oryndaldy. Nátıjesinde jylý jelileriniń senimdiligi men apatqa qarsy tózimdiligi edáýir artty.
Taǵy bir mańyzdy másele — turǵyn úılerdiń jylýmen úzdiksiz qamtylýy. Oblys ortalyǵynda jylytý maýsymy bastalǵanymen, áli de qosylmaǵan úıler bar ekendigin turǵyndar áleýmettik jelide jazyp jatyr.
Buǵan baılanysty B.Mýsın qaladaǵy kópqabatty turǵyn úılerdiń tolyqtaı ortalyq jylý júıesine qosylǵanyn aıtty. Sonymen birge barlyq áleýmettik nysandar, atap aıtqanda, mektepter, balabaqshalar, aýrýhanalar men ózge de mekemeler jylýmen qamtamasyz etildi.
— Jylý berý protsesi bekitilgen kestege sáıkes kezeń-kezeńmen júrgizildi. Árbir turǵyn úıge beriletin jylý parametrleri turaqty baqylaýda ustalyp, qajet bolǵan jaǵdaıda jedel retteý jumystary júrgizilýde. Jylý berý kezeńinde halyq tarapynan túsken ótinishter jedel qarastyrylyp, máseleler ýaqtyly sheshilip otyr. Kommýnaldyq sala qyzmetkerleri kúsheıtilgen rejımde jumys istep jatyr, — dedi basqarma basshysy.
Osylaısha turǵyndar qalany jylýmen qamtýǵa baılanysty óz alańdaýshylyǵyn bildirip otyr. Eń bastysy — jylytý maýsymyn qaýipsiz, apatsyz ótkizý.
Eske sala keteıik, budan buryn Batys Qazaqstan oblysy jylytý maýsymyna qanshalyqty daıyn ekenin jazǵan edik.