Oral qalasy ákimdigi qaýipti aýmaq turǵyndaryna kóshýge daıyn bolý kerektigin eskertti

ORAL. KAZINFORM — Oral qalasy ákimdigi qaýipti aýmaq turǵyndaryna kóshýge daıyn bolý kerektigin eskertti.

Qala ákimdiginen málim etkenindeı, oblys ortalyǵynda sý tasqyny qaýpine oraı kúrdeli jaǵdaı qalyptasyp otyr. 

Mamandardyń aıtýynsha, Reseı Federatsııasynan sýdyń mol kólemi 2-3 kúnde qalaǵa jetedi. Qaýipti deńgeı 8,5 metr bolsa, qazir Jaıyqtyń deńgeıi 8 metrge jýyqtady.

Sý tasqynyna qarsy jumysqa jergilikti atqarýshy organnyń jáne tótenshe jaǵdaı qyzmetiniń barlyq resýrsy tartyldy. Qazir 350 arnaıy tehnıka, 2 myńǵa jýyq adam tasqynǵa tosqaýyl qoıýǵa jumyldyrylǵan. Sondaı-aq ózge óńirlerden, oblys aýdandarynan kelgen áskerı qyzmetshiler, tótenshelikter jáne eriktiler bul jumysqa belsene atsalysyp jatyr.

«Eń bastysy - adamdardyńy amandyǵy. Sondyqtan Jaıyq jaıylymyndaǵy saıajaılardyń, sý basý qaýpi joǵary Kýrenı, Starıtsa, Komıntern aýdandarynyń turǵyndary kóshýi qajet. Sýdyń mol kólemi kez kelgen ýaqytta jetip, úıińizdi sý basýy múmkin. Ózińizdiń jáne jaqyn adamdaryńyzdyń ómirin qaýipke tikpeı, shuǵyl túrde týma-týys, dostaryńyzdyń úıine ornalasyńyz. Ýaqytsha baratyn úı bolmasa, qalada evakýatsııalyq pýnktter jasaqtalǵan. Olar turǵyndardy kúni-túni úzdiksiz qabyldaıdy. Suraqtar boıynsha qalalyq shtabqa 8-711-2-24-05-70 jáne 24-01-94 telefon nómirleri arqyly habarlasýǵa bolady. Evakýatsııany qazirden bastańyz!», dep habarlady vedomstvodan.

Eske sala keteıik, budan buryn Májilis depýtaty Edil Jańbyrshınniń sý tasqyny kezinde bárine de daıyn bolýymyz kerek ekendigi týraly aıtqanyn jazǵan edik. 

Sondaı-aq Jaıyq ózenindegi sý deńgeıi Oralda bir táýlikte 13 santımetrge kóterildi.