Oral qalalyq sotyna bir aıdyń ishinde myńǵa jýyq ákimshilik is tústi
ORAL. QazAqparat - BQO soty azamattyq jáne ákimshilik ister jónindegi apellıatsııalyq sot alqasynyń tóraǵasy Baqytbek Begalıevtiń tóraǵalyq etýimen ótken dóńgelek ústel otyrysynda jańa Ákimshilik quqyqbuzýshylyq kodeksin qoldanýdyń ózekti máseleleri talqylandy.
BQO sotynyń baspasóz qyzmetinen Gúlmıra Kenjeǵalıevanyń habarlaǵanyndaı, sýdıalar, prokýratýra, ishki ister departamenti, densaýlyq saqtaý basqarmasy ókilderi qatysqan jıynda sońǵy jyldary jol qozǵalysy qaýipsizdigin saqtaýǵa aıryqsha kóńil bólinip, ásirese, kólik quraldaryn mas jáne esirtkige eltigen kúıinde aıdaýshylarǵa qatysty zańnyń qatańdatylǵany atap ótildi.
Oral qalasy mamandandyrylǵan ákimshilik sotynyń tóraǵasy Ǵalymjan Işanovtyń aıtýynsha, jańa kodeks qoldanylǵan aı jarym ýaqyt ishinde birqatar rettelmegen máseleler men túıtkilderdiń, materıaldar jınaý men hattama toltyrýda olqylyqtardyń beti ashyldy. Qańtar aıynda atalǵan sotqa 914 ákimshilik is túsip, sonyń 762-si qaraldy. 706-sy boıynsha ákimshilik aıyppul salý jóninde qaýly shyǵarylsa, 56 is qysqartyldy. Osy rette azamattardy ákimshilik jaýapkershilikke tarý kezinde jiberilgen zańbuzýshylyqtarǵa baılanysty BQO ishki ister departamenti atyna 11, densaýlyq saqtaý basqarmasyna 1 jeke qaýly shyǵaryldy. Jıyn barysynda ákimshilik polıtsııasy qyzmetkerleri jibergen qatelikterge taldaý jasaldy. Sondaı-aq densaýlyq saqtaý basqarmasyna qarasty mekemelerde alkogol men esirtkini tutynýǵa baılanysty medıtsınalyq tekserýden ótkizý kezinde oryn alǵan kemshilikterge erekshe nazar aýdaryldy. Osy oraıda jyl basynan beri adamnyń ishimdik ishken ne ishpegendigine qatysty qaıtalama qorytyndy alýdyń kóbeıip ketkendigi aıtyldy, bul narkologtardyń bastapqy medıtsınalyq qorytyndysyna qaıshy kelip jatady. Otyrys qorytyndysy boıynsha ákimshilik materıaldardy sapaly toltyrý, sybaılas jemqorlyqqa jaǵdaı jasaıtyn áreketterdiń aldyn alý, salǵyrt-salaqtyq pen azamattardyń konstıtýtsııalyq quqyǵyn buzýǵa jol bermeý baǵytynda usynbalar qabyldandy.
