Oral qalalyq sotynyń burynǵy tóraǵasyna qatysty sot úkimi ózgerissiz qaldy
ORAL. KAZINFORM - Oral qalalyq sotynyń burynǵy tóraǵasy Rýslan Jumaǵulov jáne qorǵaýshy Nurjigit Fazylǵalıev jazasyn túzetý mekemesinde óteıdi. Batys Qazaqstan oblystyq sotynyń qylmystyq ister jónindegi sot alqasy birinshi satydaǵy úkimdi ózgerissiz qaldyrdy.
Sottalǵan Rýslan Jumaǵulov jáne Nurjigit Fazylǵalıev tamyz aıynda Batys Qazaqstan oblystyq sotynyń qylmystyq ister jónindegi sot alqasyna apellıatsııalyq shaǵym túsirdi. Sot 10 qyrkúıekke belgilendi. Keıin sýdıa istiń kúrdeli bolýyna baılanysty bir aıǵa sozýǵa sheshim qabyldady. Qazanda Batys Qazaqstan oblystyq sotynyń qylmystyq ister jónindegi sot alqasy shaǵymdy qarap, alǵashqy úkimdi ózgerissiz qaldyrdy.
- Sot alqasynyń qaýlysymen birinshi satydaǵy sot úkimi ózgerissiz qaldy. Qaýly jarııalanǵan kúni kúshine enedi, - dep habarlady Batys Qazaqstan oblystyq sotynyń baspasóz qyzmeti.
Eske salsaq, byltyr qarasha aıynda Oralda qalalyq sot tóraǵasy Rýslan Jumaǵulov para alý kezinde ustaldy. Sot tóraǵasymen birge eki advokat Ádil Ahmýldın men Nurjigit Fazylǵalıev te qolǵa túsken.
Іs Tasqala aýdandyq sotynda qaraldy.
Úkim bıyl maýsym aıynda shyǵyp, R.Jumaǵulov Qylmystyq kodekstiń 24-baby 3-bóligi, 190-babyna (alaıaqtyqqa oqtalý) sáıkes aıypty dep tanylyp, 2 jyl 7 aı jáne 15 kúnge bas bostandyǵynan aıyryldy.
N.Fazylǵalıev alaıaqtyqqa jáne para berýge oqtalý baptary boıynsha aıypty dep tanylyp, oǵan múlkin tárkileýmen birge 2 jyl 7 aı 15 kúnge bas bostandyǵynan aıyrý jazasy kesildi.
Іs materıalyna súıensek, kisi óltirgeni jáne qaraqshylyq jasaǵany úshin 14 jylǵa sottalǵan er adam merziminen buryn bosap shyǵý úshin ótinish bergen. Sol kezde jazasyn óteýshiniń qorǵaýshysy Fazylǵalıev Jumaǵulovqa jolyǵyp, klıentiniń merziminen bosap shyǵýy kómektesýin ótinip, 200 myń teńge usynǵan.
Keıin qorǵaýshy jazasyn óteýshiniń tanysyna sýdıaǵa 1,5 mln teńge kóleminde para berý kerektigin jetkizgen. Advokat paranyń bir bóligin ózinde qaldyrýdy sheshken. Para berýshi UQK departamentine júgingen.
R.Jumaǵulov 2019 jyldan beri qalalyq sot tóraǵasy bolyp jumys istegen.