Oral qalalyq sotynyń burynǵy tóraǵasyna qatysty sot otyrysy keıinge qaldyryldy

ORAL. KAZINFORM — Oral qalalyq sotynyń burynǵy tóraǵasy Rýslan Jumaǵulov jáne advokat Nurjigit Fazylǵalıevtiń isi boıynsha BQO sotynyń qylmystyq ister jónindegi apellıatsııalyq sot alqasynda sot otyrysy boldy. 

Onda advokat Aıgúl Moldaǵalıeva ispen tolyq tanysyp úlgermegenin aıtyp, sot otyrysyn keıinge qaldyrý jóninde ótinish bildirdi.

Muny basqa advokat, qorǵaýshylar jáne prokýror qoldady.

Osylaısha, sot otyrysy 7 qazan kúngi saǵat 15.00-ge qaldyryldy.

Eske salaıyq, budan buryn Oral qalalyq sotynyń burynǵy tóraǵasy bas bostandyǵynan aıyrylǵan bolatyn.

Rýslan Jumaǵulov QK 24-baby 3-bóligi — 190-babyna (alaıaqtyqqa oqtalý) sáıkes aıypty dep tanylyp, Tasqala aýdandyq sotynyń úkiminen 2 jyl 7 aı jáne 15 kúnge bas bostandyǵynan aıyrylǵan edi.

Sonymen qatar advokat Nurjigit Fazylǵalıev alaıaqtyqqa jáne para berýge oqtalý baptary boıynsha aıypty dep tanylyp, oǵan múlkin tárkileýmen birge 2 jyl 7 aı 15 kúnge bas bostandyǵynan aıyrý jazasy kesilgen bolatyn.

Keıin advokattar apellıatsııalyq satydaǵy sotqa shaǵym túsirdi.