Oral qalalyq sotynyń burynǵy tóraǵasy bas bostandyǵynan aıyryldy

ORAL. KAZINFORM – Tasqala aýdandyq sotynda Oral qalalyq sotynyń burynǵy tóraǵasy Rýslan Jumaǵulov pen advokat Nurjigit Fazylǵalıevke qatysty úkim shyqty.

R.Jumaǵulov QR QK 24-baby 3-bóligi – 190-babyna (alaıaqtyqqa oqtalý) sáıkes aıypty dep tanylyp, 2 jyl 7 aı jáne 15 kúnge bas bostandyǵynan aıyryldy. Osy kúnge deıin úı qamaǵynda bolǵan ol sot zalynda tutqyndaldy.

R.Jumaǵulov sonymen qatar memlekettik qyzmette laýazymdardy atqarý quqyǵynan aıyryldy.

N.Fazylǵalıev alaıaqtyqqa jáne para berýge oqtalý baptary boıynsha aıypty dep tanylyp, oǵan múlkin tárkileýmen birge 2 jyl 7 aı 15 kúnge bas bostandyǵynan aıyrý jazasy kesildi. Ol da sot zalynda tutqyndaldy. N.Fazylǵalıevke úsh jyl advokat qyzmetimen aınalysýǵa tyıym salyndy.

Sottalýshylar óz kinásin moıyndap, protsessýaldyq kelisimge keldi.

Sýdıa Álııa Teberikova qaraǵan isten málim bolǵanyndaı, Rýslan Jumaǵulov paıdakúnemdik maqsatta qasaqana aýyr sybaılas jemqorlyq qylmysqa barǵan. Ótken jyldyń 19 maýsymynda kisi óltirgeni jáne qaraqshylyq jasaǵany úshin 14 jylǵa sottalǵan er adam merziminen buryn bosap shyǵý úshin ótinish bergen. Bul ótinish buryn Jumaǵulovtyń hatshysy bolyp jumys istegen Oral qalalyq sotynyń sýdıasy Haırýshevaǵa túsken.

Jazasyn óteýshi advokat retinde N.Fazylǵalıevti jaldaǵan, buǵan tanysy kómektesken. Advokat óz qyzmeti úshin 200 myń teńge suraǵan. Sodan keıin jazasyn óteýshiniń tanysyna sýdıaǵa para berý kerektigin aıtqan, buǵan ol kelisken.

29 qazanda Fazylǵalıev Jumaǵulovqa jolyǵyp, klıentiniń merziminen bosap shyǵýy kómektesýin ótinip, 200 myń teńge usynǵan.

Budan keıin Jumaǵulov atalǵan máseleni sheshý qyzmettik ókilettigine kirmese de, aldaý jolymen atalǵan qarjyny ıemdenýdi kózdep, kómektesýge ýáde bergen. Jumaǵulovqa sengen Fazylǵalıev jazasyn óteýshiniń tanysyna sýdıaǵa 1,5 mln teńge kóleminde para berý kerektigin jetkizgen. Advokat paranyń bir bóligin ózinde qaldyrýdy sheshken. Para berýshi UQK departamentine júgingen.

Sol kúni departament qyzmetkerleriniń baqylaýymen Fazylǵalıevke 800 myń teńge berilgen. 4 qarasha kúni advokat 500 myń teńge alǵan. Ol 1,1 mln teńgeni ózi ıemdenip, muqtajyna jaratqan. 200 myń teńgeni Jumaǵulovqa bergen. Jumaǵulov Oral qalalyq sotyna kelip, aqshany qyzmettik kabınetindegi seıfke salǵan. UQK qyzmetkerleri tintý júrgizgen kezde qarjyny tapqan. Osylaısha, Jumaǵulov ózine baılanysty emes mán-jaılar boıynsha qylmystyq is-áreketin aıaǵyna deıin jetkize almaǵan.

Sot úkimi zańdy kúshine engen joq.

Eske sala keteıik, budan buryn Oral qalalyq sotynyń tóraǵasy paramen ustalǵanyn jazǵan bolatynbyz.

Sondaı-aq Oral qalalyq soty burynǵy tóraǵasynyń isi Tasqalada qaralatyny habarlandy.