Oral halyqaralyq áýejaıyn baqylaý quqyǵy qazaqstandyq ınvestorlarda qalady
Áleýmettik jelide «Mánshúk Mámetova atyndaǵy Oral halyqaralyq áýejaıynyń» menshik ıeleri ózgerdi degen aqparat taraǵan bolatyn. Osyǵan baılanysty «Aqjaiyq» ÁKK» AQ-dan aqparat kelip tústi. Odan alynǵan málimetke qaraǵanda, «Oral qalasy halyqaralyq áýejaıy termınaly ǵımaratyn qaıta qurý jáne jańǵyrtý» jobasyn júzege asyrý aıasynda ÁKK men «Oral» halyqaralyq áýejaıy arasynda birlesken qyzmet jóninde kelisim jasalǵan.
«Aqjaiyq» ÁKK» AQ «Qarashyǵanaq Petrolıým Opereıtıng b.v.» kompanııasynyń óńirdiń damýyna bóletin áleýmettik aýdarymdary esebinen ınvestıtsııa tartyp, áýejaı ǵımaratyn qaıta jańǵyrtty. Investıtsııa kólemi – 6,6 mlrd teńge. «Aqjaiyq» ÁKK» AQ termınal qaıta qurýdan ótkennen keıin nysandy 2022 jylǵy 6 sáýirde «Oral» halyqaralyq áýejaıy» JShS-ne úsh jyl merzimge senimdi basqarýǵa berdi. Atalǵan JShS quryltaıshylarynyń aýysýy eki mekeme arasyndaǵy kelisim mindettemelerine áser etpeıdi, óıtkeni bul eki zańdy tulǵa arasyndaǵy qarym-qatynas», - delingen «Aqjaiyq» ÁKK» AQ-dan túsken aqparatta.
«Oral» halyqaralyq áýejaıy» JShS baspasóz qyzmeti de osy máselege oraı aqparatymen bólisti. Onda atalǵan JShS-ni ıemdený jónindegi kelisimniń máresine jetkeni aıtylǵan. Mánshúk Mámetova atyndaǵy halyqaralyq áýejaı kompanııasy-operatoryn áýejaıdy basqarýǵa mamandanǵan qazaqstandyq «Ýralsk Menedjment» JShS, QR azamaty D. Qılybaev jáne reseılik «Retrans» AQ-dan (qatysý úlesi 49 paıyzdan kóp emes) turatyn konsortsıým satyp aldy. Baqylaý qazaqstandyq ınvestorlarda qalady.
«Jańa menshik ıeleri jolaýshylar men áýe kompanııalary úshin qyzmet kórsetý sapasyn jaqsartyp, áýejaıdy tehnıkalyq jaǵynan jaraqtandyrý, bıznes isin jandandyrýdy josparlap otyr. Munyń bári halyqaralyq tasymaldy damytý áleýetin kóterip, sondaı-aq júk tasymaly kólemin ósirýge múmkindik beredi. Qazirgi tańda Oral áýejaıyndaǵy jolaýshylar tasqyny jylyna 300 myń adamnan asady. Áýejaıdyń Qazaqstannyń soltústik-batysynda yńǵaıly ornalasýy munda tranzıttik tasymaldy damytyp, sonyń negizinde óńirlik habty qalyptastyrýǵa múmkindik beredi», - dep habarlady «Oral» halyqaralyq áýejaıy» JShS-dan.
Eske sala keteıik, budan buryn Oral áýejaıyna Mánshúk Mámetovanyń esimi berilgenin jazǵan bolatynbyz.
