Oral dopty hokkeıiniń túlegi Raýan Isalıev «Aqjaıyqqa» qaıtyp oraldy

ORAL. KAZINFORM – Belgili shabýylshy Raýan Isalıev jańa maýsymda «Aqjaıyq» dopty hokkeı klýbynyń namysyn qorǵaıdy.

«Aqjaıyq» sport klýbynan alynǵan málimetke qaraǵanda, R.Isalıevpen kelisim jasalǵan. Oral qalasynda 1988 jyly dúnıege kelgen Raýan Isalıev bendı álippesin «Aqjaıyq» komandasynyń quramynda úırendi.

Shabýylshy 2008 jyldan beri reseılik «Vodnık», «Start», «Sıbselmash», «Baıkal-Energııa», sondaı-aq shvetsııalyq «Vetlanda» klýbynda óner kórsetti.

Raýan Isalıev Qazaqstan ulttyq quramasy sapynda álem chempıonatynyń tórt dúrkin qola júldegeri atandy.

2011 jyly Almatyda Qysqy Azııa oıyndarynyń chempıony atanýmen birge qarsylastar qaqpasyna gol soǵýdan aldyna jan salǵan joq. Sondaı-aq 2018 jyly aqpanda Qazaqstan quramasynyń kapıtany Habarovskide ótken álem chempıonatynda 21 gol, 7 nátıjeli paspen birinshiliktiń úzdik surmergeni boldy. Shvetsııa kýbogynyń qola júldesine qosa Reseı kýbogynyń fınalısi atandy.

Raýan Isalıev Shvetsııa kýbogynda 6 oıynda 5 gol soqty. Elıtalyq serııada 34 oıynda 18 gol, 5 nátıjeli pas, Reseı kýbogynda 106 matchta 88 gol, 50 pas, Reseı chempıonatynda 378 kezdesýde 297 gol, 149 paspen kózge tústi. Raýan sonymen qatar Qazaqstan quramasy sapynda 64 oıyn ótkizip, 82 goldyń avtory atandy.

Dopty hokkeıden Reseı chempıonatynyń joǵary lıgasynda oınaıtyn «Aqjaıyq» jańa maýsymǵa daıyndyǵyn bastap ketti.

Eske sala keteıik, budan buryn dopty hokkeıden «Aqjaıyqtyń» oıynshysy bir maýsymda 100-ge jýyq gol soqqanyn jazǵan bolatynbyz.