Oral aýrýhanasynda egizdi dúnıege ákelgen kelinshek kóz jumdy
Qalalyq kópbeıindi aýrýhana dırektorynyń orynbasary mindetin atqarýshy Natalıa Kochegarovanyń málim etkenindeı, qan kóp ketkendikten, Elvıra Áshimova 30 sáýir kúni saǵat 11.00-de qaıtys boldy.
Onyń sózine qaraǵanda, áıeldiń 10, 5 jáne 1,5 jastaǵy úsh balasy bar. Úshinshi balasyn bosanǵannan 5 aı ótken soń, egizge júkti bolǵan. Qysqa ýaqyt ishinde aǵza qalpyna kelip úlgermegen. Onymen qosa, búıreginde ınfektsııa anyqtalyp, júktilik kezinde emdelgen. Anemııa da bolǵan.
«Áıel aýrýhanaǵa 27 sáýir kúni tústi. Sol kezde qan qysymy joǵary bolyp, ózin álsiz sezinip, basy aınalǵany jóninde aıtty. Sosyn qan quıý jóninde sheshim qabyldandy. Ol kelisimin berdi. Qan quıý qalypty ótip, gemoglobıni kóterildi. Kelesi kúni bosaný zalyna aýystyryldy. Ómirge egiz shaqalaq keldi. Olardyń árqaısysynyń salmaǵy 3 kelige jýyq. Platsentany, sýdy qosa alǵanda, shaqalaqtardyń jalpy salmaǵy 8-10 kelini qurady. Munyń jatyrǵa qanshama aýyr salmaq túsiretinin shamalaýǵa bolady», - deıdi N.Kochegarova.
Onyń aıtýynsha, áıel bosanǵannan keıin qan kete bastaǵan. 30 sáýirge qaraǵan túni ota jasalyp, jatyr alynyp tastalǵan. Qolǵa alynǵan is-sharalarǵa qaramastan, kóp qan joǵaltqan áıeldi aman alyp qalý múmkin bolmady.
«Egiz bala aman-saý, olardy týystary alyp ketti», - dedi N.Kochegarova.
Aıta keteıik, bul – sońǵy kezde Oral qalasynda bolǵan ekinshi oqıǵa. 29 sáýirde on kún boıy es-tússiz jatqan Tańsholpan Muqanova ómirden ótti. Oǵan oblystyq perınataldy ortalyqta kesar tiligimen ota jasalyp, qyz bala dúnıege kelgen. Keıin ol oblystyq aýrýhanaǵa aýystyrylyp, sonda qaıtys bolǵan.
Oblystyq densaýlyq saqtaý basqarmasynan túsken málimetke qaraǵanda, qazirgi kezde osy eki oqıǵa boıynsha arnaıy komıssııa jumys jasap jatyr.