Oral áýejaıyna Mánshúk Mámetovanyń esimi berildi
BQO tilderdi damytý basqarmasy málim etkenindeı, áýejaıǵa M.Mámetovanyń esimin berý týraly QR Úkimetiniń 18 naýryzdaǵy qaýlysy shyqty.
Qaýly shyqqan kúnnen bastap kúshine endi.
Mánshúk Mámetova 1922 jyly Batys Qazaqstan oblysy Bókeı ordasy aýdanynda dúnıege kelgen. Ákesiniń esimi – Jeńsigáli (kóptegen derekterde Jıenǵalı dep qate jazylyp ketken), anasy – Toıylsha.
Mánshúkti kishkentaı kezinde Jeńsigáliniń nemere inisi, belgili Alash qaıratkeri, qazaqtan shyqqan alǵashqy dárigerlerdiń biri, aqyn, aǵartýshy Ahmet Mámetov asyrap alady. Anasy Ámına Súleımenova da – qazaq oqyǵandarynyń biri.
1938 jyly A.Mámetov «halyq jaýy» atanyp ustalyp ketkennen keıin Mánshúk ákesin qalaıda aqtap alamyn dep, maıdanǵa attanǵan. Sodan pýlemetshi qyz 1943 jyly 16 qazanda qaharmandyqpen qaza tapqan. Oǵan 1944 jyly Keńes Odaǵynyń Batyry ataǵy berildi.
Bıyl Batys Qazaqstan oblysynda Mánshúk Mámetovanyń 100 jyldyǵyna arnalǵan is-sharalar ótedi.
Eske sala keteıik, budan buryn Oral áýejaıyna Mánshúk Mámetovanyń esimin berý usynylǵanyn jazǵan bolatynbyz.