Oral áýejaıyn satý týraly mámile qupııa júrgizilgen joq – BQO ákimi

ASTANA. QazAqparat – Batys Qazaqstan oblysynyń ákimi Narıman Tóreǵalıev Oral áýejaıynyń quryltaıshysyn aýystyrý týraly pikir bildirdi, dep habarlaıdy QazAqparat tilshisi.

Óz jaýabynda Narıman Tóreǵalıev strategııalyq nysan – ushý-qoný jolaǵy respýblıkalyq menshikte ekenin atap ótti.

«Atalǵan mámile jasyryn júrgizilgen joq. Bul - strategııalyq nysan, biraq búginde ushý-qoný jolaǵy respýblıkalyq menshikte. Úlestiń 49% - reseılik kompanııada, sondyqtan barlyq strategııalyq nysandar memleket menshiginde bolady. Bul - qyzmet kórsetetin basqarýshy kompanııa. Eshqandaı qaýip joq, sondyqtan sizder halyqqa durys aqparat berýlerińiz kerek», - dedi Narıman Tóreǵalıev Úkimet kýlýarynda tilshilerge bergen suhbatynda.

Buǵan deıin BAQ-ta halyqaralyq áýejaıdyń jańa ıesi «Oral áýejaı holdıng» kompanııasy bolǵanyn, onyń 49% - kásipker Dáýlethan Kılybaevqa, 2% - «Oral menedjment» JShS-ne jáne 49% - reseılik «Retrans» AQ-ǵa tıesili ekeni habarlanǵan bolatyn.