Oral áýejaıynda tolyq qaıta qurý jumystary júrgizile me

ORAL. KAZINFORM — Memleket basshysy Qasym-Jomart Toqaev bıylǵy Joldaýynda Eýropa men Azııanyń arasyn jalǵaıtyn negizgi áýe dálizderi elimizdiń aýmaǵy arqyly ótetinin, osy artyqshylyqty paıdalana bilý kerektigin aıtqan edi.

Oral áýejaıynda tolyq qaıta qurý jumystary júrgizile me
Foto: "Oral halyqaralyq áýejaıy" JShS

Eýropa men Azııanyń túıisken jerinde ornalasqan, Qazaqstannyń batys qaqpasy bolyp esepteletin Oral qalasynyń Mánshúk Mámetova atyndaǵy halyqaralyq áýejaıy zamanaýı talaptarǵa saı ma? Áýejaı múmkindigi qalaı paıdalanylyp jatyr, onda tolyq qaıta qurý jumystary júrgizile me? Osy máselege oraı Kazinform tıisti mekemelerge arnaıy saýal joldaǵan edi.

Oral áýejaıy
Foto: "Oral halyqaralyq áýejaıy" JShS

«Aqjaiyq» áleýmettik-kásipkerlik korporatsııasy» AQ basqarma tóraǵasy Erjan Dosmaqovtyń málim etkenindeı, qazirgi ýaqytta Oral halyqaralyq áýejaıynyń jolaýshylar termınalyn tolyq rekonstrýktsııalaý josparlanbaǵan. Degenmen, jolaýshylarǵa yńǵaıly jaǵdaı jasaý jáne áýe kemesine otyrǵyzý men túsirý kezinde, ásirese, qolaısyz aýa raıynda, jaılylyqty qamtamasyz etý maqsatynda teleskopııalyq trappen jabdyqtalǵan jolaýshylar galereıasyn salý jobasy ázirlenip jatyr.

- Kúni búgin jobalyq-smetalyq qujattamany ázirleý jumystary júrgizilý ústinde. Bul jumystarǵa «Kýlman» JShS tartylǵan, kelisimshart quny – 38,96 mln teńge. Jobany iske asyrýdyń aldyn ala quny shamamen – 1 mlrd teńge. Alaıda naqty quny jobalyq-smetalyq qujattama ázirlenip, memlekettik saraptamanyń qorytyndysy alynǵannan keıin belgili bolady. Qurylys jumystarynyń bastalý merzimi men uzaqtyǵy ázirge naqtylanbaǵan, - dedi E.Dosmaqov.

«Oral» halyqaralyq áýejaıy» JShS-nyń baspasóz qyzmetinen túsken málimetke qaraǵanda, mekeme azamattyq avıatsııa salasyndaǵy Qazaqstan Respýblıkasynyń qoldanystaǵy normatıvtik-quqyqtyq talaptary men halyqaralyq azamattyq avıatsııa standarttaryn basshylyqqa ala otyryp jumys isteıdi. Áýejaıdyń qyzmeti ýákiletti memlekettik organdardyń talaptaryna sáıkes baqylaýdan jáne baǵalaýdan ótedi. 2025 jyly áýejaı Qazaqstannyń avıatsııalyq ákimshiligi tarapynan júrgizilgen sertıfıkattyq tekserýden sátti ótip, áýejaı tarıhynda alǵash ret 3 jyl (onyń aldynda eń uzaq sertıfıkat 2 jylǵa berilgen) merzimge aerodromnyń jaramdylyq sertıfıkatyna ıe boldy.

«Oral halyqaralyq áýejaıy» JShS-nyń málimeti boıynsha 2026–2027 jyldardaǵy kúzgi-qysqy navıgatsııa kezeńinde áýejaıdyń marshrýttyq jelisi keńeıtildi.

Qazirgi ýaqytta turaqty reıster elimizdiń ishinde Almaty, Astana, Túrkistan jáne Aqtaýmen eki arada ornatylǵan. Al halyqaralyq baǵyttar boıynsha ushaqtar Ystanbul, Frankfýrt, Sharm-el-Sheıh, Phýket qalalaryna qatynaıdy.

Reısterdi Air Astana, FlyArystan, SCAT, Pegasus Airlines áýe kompanııalary oryndaıdy.

Marshrýttardyń jıiligine qaraı reıster kúndelikti jáne aptasyna birneshe ret júzege asyrylady.

«Oral» halyqaralyq áýejaıy» kúzgi-qysqy kezeńde áýe kemeleriniń ushý qaýipsizdigin jáne jolaýshylarǵa qyzmet kórsetýdiń úzdiksizdigin qamtamasyz etý maqsatynda keshendi daıyndyq jumystaryn qyrkúıek-qazan aılarynda júrgizdi. Qazir de bul jumys jalǵasyn tabýda. Atap aıtqanda, ushý-qoný jolaǵy, rýlejdik joldar men perrondy qardan, muzdan jáne qar aralas jaýyn-shashynnan ýaqtyly tazartý jumystary uıymdastyrylǵan. Sondaı-aq áýeaılaqtyń arnaıy tehnıkasy men qar tazalaý quraldarynyń qysqy paıdalanýǵa daıyndyǵy qamtamasyz etilýde.

Ushý-qoný jolaǵynyń úıkelis koeffıtsıenti men jabyn jaǵdaıyna turaqty baqylaý júrgiziledi. Áýe kemelerin muzdanýǵa qarsy óńdeýge arnalǵan arnaıy reagentter men materıaldardyń qory qalyptastyryldy.

Áýeaılaqty qardan tazalaý tehnıkasy jáne áýe kemelerin muzdanýǵa qarsy óńdeý qyzmetiniń qoljetimdiligin qamtamasyz etý úshin arnaıy tehnıka men mamandar daıyndyqtan ótkizildi.

- Áýejaı qyzmetteri arasynda qysqy kezeńdegi ózara is-qımyl jáne tótenshe jaǵdaılarǵa den qoıý máseleleri pysyqtaldy. Barlyq jumystar Qazaqstan Respýblıkasynyń azamattyq avıatsııa salasyndaǵy qoldanystaǵy normatıvtik talaptaryna jáne ushý qaýipsizdigi standarttaryna sáıkes júzege asyrylady. Áýejaıdyń ınfraqurylymy men óndiristik qyzmeti ushý qaýipsizdigin qamtamasyz etýge baǵyttalǵan, - delingen vedomstvo usynǵan aqparatta.

Oral qalasynyń turǵyny Janar Maǵzomovanyń aıtýynsha, budan onshaqty jyl buryn áýejaıdyń ushý-qoný jolaǵy kúrdeli jóndeýden ótkizildi. Sodan keıin ǵımarat qaıta salyndy. Áıtse de jolaýshylar úshin qolaısyzdyq tolyqtaı joıylǵan joq.

- Basqa qalalarda áýejaılarda qosymsha teleskopııalyq trap ornatylǵan. ıAǵnı jolaýshylar termınal ǵımaratynan trap arqyly ushaqqa tikeleı ótedi. Al Oralda adamdardy áýe kemesine, odan termınalǵa deıin avtobýspen tasymaldaıdy. Bul, árıne, kim-kim úshin de yńǵaısyz. O basta muny birden oılastyrǵanda, durys bolatyn edi, - deıdi J.Maǵzomova.

Eske sala keteıik, budan buryn Oral áýejaıynyń ushý-qonaǵy kúrdeli jóndeýden ótkizilip jatqanyn jazǵan edik.

Sondaı-aq Kólik mınıstrligi Oral áýejaıyn jańǵyrtý úshin birqatar naqty mindet júktedi.