Oral áýejaıynda 500 myńnan astam jolaýshyǵa qyzmet kórsetildi

ORAL. KAZINFORM – M.Mámetova atyndaǵy Oral halyqaralyq áýejaıynda ótken jyly 500 myńnan astam jolaýshyǵa qyzmet kórsetildi.

«Oral halyqaralyq áýejaıy» JShS baspasóz qyzmetinen málim etkenindeı, bul – sońǵy 55 jyldaǵy eń joǵary kórsetkish. Aldyńǵy jylmen salystyrǵanda, jolaýshylar aǵyny 23 paıyzǵa ósti. Sonyń ishinde ishki reıster boıynsha 480 myńnan astam jolaýshy saıahattaǵan.

- Adamdar barlyǵy 10 baǵyt boıynsha ushsa, sonyń tórteýi – halyqaralyq. Eń suranysqa ıe baǵyttar – Astana jáne Almaty qalalary. Halyqaralyq baǵyttar arasynda Antalııa kósh bastap tur, - dep habarlady vedomstvodan.

«Oral halyqaralyq áýejaıy» JShS-dan túsken málimetke qaraǵanda, ótken jyly arnaıy tehnıka parki órt sóndirý mashınasymen, frontaldy tıegishpen, qardy tazartýǵa arnalǵan eki arnaıy Boschung áýeaılaq mashınasymen, qurama jol mashınasymen tolyqtyryldy. Sondaı-aq jyl sońynda jabyq konstrýktsııaly eki jańa trap, suıyq reagentti shashatyn tirkemeli úlestirgish jáne mehanıkalandyrý quraldary satyp alyndy.

Barlyq qaýipsizdik talaptaryna saı keletin jańa baqylaý-ótkizý beketiniń qurylysy aıaqtaldy. Atalmysh beket osy jyldyń qańtar-aqpan aılarynda paıdalanýǵa berilmek.

Eske sala keteıik, budan buryn Oral qalasynan Mysyrǵa qatynaıtyn reıster sany artatynyn jazǵan edik.