Oral áýejaıynan Máskeýge tikeleı reıs ashylady
ORAL. KAZINFORM — M.Mámetova atyndaǵy Oral halyqaralyq áýejaıynan Máskeý qalasyna bıylǵy 27 qazannan bastap tikeleı reıs oryndalady.
«Oral halyqaralyq áýejaıy» JShS-nyń baspasóz qyzmetinen málim etkenindeı, atalmysh baǵytta Oral áýejaıy úshin jańa tasymaldaýshy – Nordwind áýe kompanııasy qyzmet kórsetedi.
Máskeýmen tikeleı áýe qatynasynyń qajettigin oblys turǵyndary aıtyp júrgen bolatyn. Bul Reseı astanasyna jolaýshylarǵa basqa jerge soqpaı barýǵa ári ýaqyt únemdeýge múmkindik beredi.
Reıster kúzgi jáne qysqy kezeńde aptasyna eki ret - sársenbi jáne jeksenbi kúnderi oryndalady. Eki araǵa 189 jolaýshy syıatyn Boeing 737-800 ushaǵy qatynaıdy. Bıletter qazirdiń ózinde satylyp jatyr.
Sonymen qatar SCAT áýe kompanııasy Almaty – Oral – Almaty baǵyty boıynsha 25 qazannan reısterdi kún saıyn oryndaı bastaıdy.
Reıster kúzgi-qysqy navıgatsııa kezeńinde Boeing 737 áýe kemelerimen júzege asyrylady.
- Óńir jolaýshylary úshin bul Almatyǵa saparlaryn josparlaýǵa burynǵydan da kóp múmkindik beredi. Reısterdiń kúndelikti oryndalýy saıahat úshin eń qolaıly kúndi tańdaýǵa septesedi. Almaty Batys Qazaqstan turǵyndary úshin eń suranysqa ıe baǵyttardyń biri bolyp qala beredi, - delingen resmı málimette.
Eske sala keteıik, budan buryn Oraldan Tashkentke qatynaıtyn áýe reısi toqtatylǵanyn jazǵan edik.
