Oral áýejaıynan qatynaıtyn reıster sany artady

ORAL. KAZINFORM – M.Mámetova atyndaǵy Oral halyqaralyq áýejaıynan naýryz aıynda qatynaıtyn reıster sany artatyn bolady.

«Oral halyqaralyq áýejaıy» JShS-nyń baspasóz qyzmetinen málim etkenindeı, naýryz aıynda Oral qalasynan 6 baǵyt boıynsha turaqty jáne charterlik jolaýshylar reısteri josparlanǵan. Reısterdi 4 áýe kompanııasy oryndaıtyn bolady.

Eki áýe kompanııasy Sharm-el-Sheıhke maýsymdyq reısterdi jalǵastyrady. Bular – Scat jáne Fly Arystan.

- Elimizdiń ishinde Astana, Almaty, Aqtaý, Atyraý qalalaryna reıster oryndalady. Astana men Almatyǵa reıster kún saıyn qatynaıdy. Naýryzda Fly Arystan bul qalalarǵa qosymsha reısterdi bastaıdy. Osylaısha, 3 naýryzdan bastap ár dúısenbide Astanaǵa qosymsha reıs baǵyt alady. Sondaı-aq Naýryz merekesi qarsańynda Astanaǵa taǵy 6 qosymsha reıs jáne Almatyǵa 2 reıs jolaýshylardy tasymaldaıdy. 5 aqpannan bastap Astanaǵa ár sársenbi kúni ushatyn qosymsha reıs iske qosyldy, - dep habarlady vedomstvodan.

Eske sala keteıik, budan buryn Oral áýejaıynda 500 myńnan astam jolaýshyǵa qyzmet kórsetilgenin jazǵan edik.