Oral-Atyraý jolynda aýdarylyp qalǵan eki kólikten 24 qap balyq tabyldy
ORAL. QazAqparat – Batys Qazaqstan oblysynda jol apatyna ushyraǵan eki kólikten 24 qap balyq tabyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, oqıǵa 11 aqpan kúni Oral-Atyraý joly boıynda Aqjaıyq aýdany aýmaǵynda boldy.
Jol júrý erejesin saqtamaǵan júrgizýshiler rýlge ıe bola almaı, «Toıota Prado» jáne «LEXUS LX 470» kólikteriniń jol jıegine aýdarylyp qalýyna jol bergen.
Jol-kólik oqıǵasynan eshkim zardap shekken joq.
Oqıǵa ornyna jetken polıtsııa qyzmetkerleri eki avtokóliktiń salonynan tıisti qujattary joq 24 qap qara balyqtardy tapty.
Balyqtyń naqty salmaǵy saraptamadan keıin belgili bolady.
Osy derek boıynsha QR QK 196-babyna (kórineý qylmystyq jolmen tabylǵan múlikti ıemdený nemese ótkizý) sáıkes sotqa deıingi tergeý amaldary bastaldy.
Eske sala keteıik, budan buryn Batys Qazaqstanda kóktaıǵaqqa baılanysty taǵy da joldar jabylǵanyn jazǵan bolatynbyz.
