«Oral-Atyraý» tasjolyndaǵy kólik apatynan 3 adam mert boldy

Atyraý oblystyq polıtsııa departamenti baspasóz qyzmetiniń málimetinshe, jol-kólik oqıǵasy Inder-Atyraý tasjolynda ornalasqan Kóktoǵaı aýyly mańynda bolǵan. Apattyń saldarynan 3 adam qaza tapty. Avtobýsta bolǵan 43 adamnyń 15-i balalar. Balalardyń arasynda qurban bolǵandar joq.

Atyraý oblystyq densaýlyq saqtaý basqarmasynyń baspasóz qyzmeti xabarlaǵandaı, apat nátıjesinde 15 adam Atyraý oblysynyń medıtsınalyq mekemelerine jetkizildi.

Dárigerlerdiń aıtýynsha, 5 adam Atyraý oblystyq aýrýxanasyna jetkizildi. Taǵy 5 adam Mahambet aýdanynyń ortalyq aýdandyq aýrýhanasyna jáne 4 adam Inder aýdanynyń ortalyq aýdandyq aýrýhanasyna emdeýge tirkeldi.

Qazirgi ýaqytta barlyq medıtsınalyq qyzmetter zardap shekkenderdi qabyldaýǵa daıyn. Oqıǵa ornynda 10 jedel járdem brıgadasy jumys istedi. Mobıldi dárigerlik ambýlatorııa ornalastyrylǵan.

Aýdan ákimdigi tótenshe jaǵdaı bolǵan avtobýs jolaýshylaryna ystyq tamaq uıymdastyrdy, ári qaraı kelgen jerge jetkizý úshin kólik daıyndady. Psıholog zardap shekkendermen jumys isteıdi. Oblystyq densaýlyq saqtaý basqarmasynda atap ótkendeı, olardyń densaýlyǵyna qaýip joq.

Jolaýshylar men olardyń jaı-kúıi týraly qajetti aqparatty alý úshin 98 02 92, 8778 0072021 telefondary táýlik boıy baılanysta. Apattyń sebepterin tergeý júrgizetin organdar anyqtaýda. Aldyn-ala tergeý Qazaqstan Respýblıkasy Qylmystyq kodeksiniń 345-babynyń 4-tarmaǵy - «Kólik quraldaryn basqaratyn tulǵalardyń jol qozǵalysy erejelerin buzý nemese kólik quraldarynyń jumysyn buzý» boıynsha júrgiziledi.

Osyǵan deıin Atyraý oblysynda avtobýs pen júk kóligi soqtyǵysqany týraly jazdyq.