Oral-Atyraý baǵytyndaǵy jol apatyna aıypty 10 jylǵa sottalýy múmkin
ATYRAÝ. QazAqparat - Oral - Atyraý tasjolyndaǵy jol-kólik oqıǵasyna aıypty 10 jylǵa deıin bas bostandyǵynan aıyrylýy múmkin, dep habarlaıdy «QazAqparat» HAA tilshisi.
Aıta keteıik, avtobýs jáne júk kóliginiń qatysýymen bolǵan jol-kólik oqıǵasy 26 aqpan kúni Atyraý oblysyndaǵy Kóktoǵaı aýylynyń mańynda boldy. 43 jolaýshysy bar avtobýsta Atyraýǵa jarysqa bet alǵan 15 jas sportshy bolǵan. Olardyń on ekisi aýyr jaraqat alsa, eresek úsheýi oqıǵa ornynda jan tapsyrdy.
«Erejege sáıkes, balalardy jolǵa alyp shyqqandar Oral sport basqarmasynyń kelisimin alyp, vedomstvo basshylyǵyna qala syrtyna shyǵyp bara jatqanyn eskertý kerek bolǵan. Budan ózge, oqýshylardy tasymaldaýshy júrgizýshiniń issapar kýáligi men mehanık jáne dárigerdiń qoly qoıylǵan jolsapar qaǵazy bolýy tıis. Sondaı-aq, sportshy balalardyń tasymaldanýy jóninde Atyraý jáne Batys Qazaqstan oblystaryndaǵy polıtsııa qyzmetine hat joldanýy kerek bolǵan. Ókinishke oraı, bulardyń eshqaısysy oryndalmaǵan. QR QK-iniń 4b, 345 babynda qarastyrylǵan «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» boıynsha sotqa deıingi tergeý amaldary júrgizilip jatyr», - dep habarlady Atyraý oblysy polıtsııa departamentiniń baspasóz hatshysy Nazymgúl Qaısaǵalıeva.
Atalǵan bap boıynsha sot aıypty dep tanyǵan jaǵdaıda avtobýs júrgizýshisi 5 jyldan 10 jylǵa deıin bas bostandyǵynan aıyrylýy múmkin.
