Oral-Atyraý jolyn jóndeý kezinde alynǵan asfalt qaldyǵy qaıda ketip jatyr
ORAL. KAZINFORM — Respýblıkalyq mańyzy bar Oral-Atyraý avtojolyn jóndeýge baılanysty asfalttyń betki qabaty alynǵany jóninde áleýmettik jelide beınejazba jarııalandy.
Qoǵam belsendisi Almagúl Iqsanovanyń Instagram áleýmettik jelisinde Chapaev-Oral qalasy aralyǵynda atalmysh joldan alynǵan asfalt qaldyǵy qaıda ketkenin bilgisi keletinin málim etken.
— Osy jol boıynda qanshama aýyl bar. Eldi mekender turǵyndary keńes dáýirinen beri jol qıyndyǵyn kórip keledi. Asfalt qaldyǵyn sol aýyldarǵa aparatyn kireberis joldarǵa nege tósemeske? — deıdi A.Iqsanova.
Atalǵan máselege oraı túsinik bergen «QazAvtoJol» UK» AQ BQO fılıalynyń dırektory Asylbek Mardannyń aıtýynsha, bıyl Oral-Atyraý jolynyń 372-432 jáne 432-492 shaqyrymy ýchaskelerinde ortasha jóndeý jumystary júrgizilip jatyr.
Memlekettik satyp alý rásimderiniń qorytyndysyna sáıkes «DSK Prıorıtet» JShS merdiger uıym retinde anyqtaldy.
— Joba aıasynda burynnan bar asfaltbeton qabatyn kesý, jańa asfalt tóseý, sondaı-aq jańa materıal qosyp, jol shetin nyǵaıtý jumystary qarastyrylǵan. Kesip alynǵan materıal jobalyq sheshimderge sáıkes jol shetin nyǵaıtý úshin paıdalanylady. «QazAvtoJol» UK» AQ Batys Qazaqstan oblystyq fılıaly halyqaralyq jáne respýblıkalyq mańyzy bar avtojoldardy jóndeý, paıdalaný jáne kútip ustaý jumystarymen aınalysady. Sonymen qatar kólik quraldarynyń qaýipsizdigi men úzdiksiz qozǵalysyn qamtamasyz etedi, — dedi A.Mardan.
Onyń ekpin túsirýinshe, atalǵan materıaldardy jergilikti mańyzy bar avtojoldardy jóndeý, kútip ustaý jáne basqa sharalar úshin qoldaný bıýdjettik qarjyny maqsatsyz paıdalaný bolyp esepteledi.
«DSK Prıorıtet» JShS-dan alynǵan málimetke qaraǵanda, joba sáýir aıynyń ortasynda bastalyp, qazirgi tańda jol-qurylys jumystary qarqyndy júrgizilip jatyr.
Búginde segiz shaqyrym jolǵa iri túıirshikti asfaltbeton jabyny tóselgen. Ortasha jóndeý aıasynda jol jamylǵysynyń tozǵan betki qabaty tolyqtaı frezerlenip, keıinnen iri túıirshikti jáne usaq túıirshikti asfaltbeton qabattaryn kezeń-kezeńimen tóseý qarastyrylǵan.
— Joba barysynda resýrsty tıimdi paıdalaný máselesine de basymdyq berilgen. Frezerleý kezinde alynǵan eski asfalt materıaly jol jıekterin nyǵaıtý jumystaryna qaıta qoldanylatyn bolady. Qazirgi ýaqytta bul materıal arnaıy daıyndalǵan alańdarǵa jınaqtalyp jatyr. Jobany tolyq aıaqtaý osy jyldyń qazan aıynyń sońyna josparlanǵan, — delingen resmı jaýapta.
Jalpy, Oral-Atyraý jolynda apat jıi bolatyndyqtan, «ólim trassasy» atanyp ketkeni belgili. BQO polıtsııa departamenti baspasóz qyzmetiniń málimeti boıynsha bıylǵy tórt aıda 4 jol-kólik oqıǵasynan 1 adam qaza taýyp, 11-i túrli jaraqat alǵan.
Eske sala keteıik, budan buryn BQO-da jaıaý júrginshi bóligi qulaǵan kópirdi zertteý jumystary bastalǵanyn jazǵan edik.
