Oral – Atyraý tasjoly ortasha jóndeýden ótip jatyr
ORAL. KAZINFORM – Respýblıkalyq mańyzy bar «Oral–Atyraý» tasjolynyń jalpy uzyndyǵy 500 shaqyrymǵa jýyqtasa, BQO-daǵy bóligi 303 shaqyrymdy quraıdy. Bıyl óńir aýmaǵynda atalǵan kúre joldy ortasha jóndeý boıynsha 3 joba júzege asyrylýda.
Oblys ákiminiń orynbasary Mıras Múlkáı bastaǵan quzyrly qurylym basshylary jáne «QazAvtoJol» UK» AQ BQOF dırektory Asylbek Mardanov merdigerlermen kezdesip, atqarylyp jatqan jumystarǵa zer saldy.
«Atyraý–Oral» avtojolynyń 189–249 shaqyrym ýchaskesin ortasha jóndeý jumystaryn «Aıdana» JShS júrgizýde. Joba quny 8,5 mlrd teńgege jýyqtaıdy. Munda 20 shaqyrym jol resaıklıng ádisimen retke keltiriledi. Keıin 60 shaqyrym joldyń tómengi qabatyna iri túıirshikti, al joǵarǵy qabatyna usaq túıirshikti asfaltbeton tóseledi. Ýchaskede 4 aıaldama pavılony ornatylady.
«Atyraý–Oral» avtojolynyń 372–432 shaqyrym jáne 432–492 shaqyrym ýchaskelerin ortasha jóndeý boıynsha qos jobany «DSK Prıorıtet» JShS júzege asyrýda. Munda eski joldyń 29 shaqyrym bóligi resaıklıng ádisimen qaıta óńdeledi. 120 shaqyrym jol qabattaryna iri jáne usaq túıirshikti asfaltbeton tóseledi. 18 aıaldama pavılony ornatylady.
Bıyl respýblıkalyq mańyzy bar «Chapaev–Jalpaqtal–Kaztalovka–RF shekarasy» avtojolynyń 0–17 shaqyrym ýchaskesi de jóndelip jatyr. 2,7 mlrd teńgeniń jobasyn «TOBI» JShS júzege asyrady. 16,5 shaqyrym jolǵa resaıklıng jasalady. Ýchaskege iri túıirshikti jáne beriktigi joǵary arnaıy asfaltbeton tóselip, 1 avtomatty ólsheý júıesi ornatylady.
«TOBI» kompanııasy «Aqtóbe–Oral–RF shekarasy» avtojolynyń 369–408 shaqyrym ýchaskesin de jóndep jatyr. Munda 26 shaqyrym jol resaıklıng ádisimen qaıta óńdeledi. 39 shaqyrymǵa beriktigi joǵary asfaltbeton tóselip, Shiderti men Óleńti ózenderindegi kópirlerdiń deformatsııalyq jikteri aýystyrylady. Ýchaskede 4 aıaldama pavılony ornatylady.
Atalǵan 5 jobanyń nátıjesinde jalpy uzyndyǵy 236 shaqyrym kúre joldar ortasha jóndeýden ótedi. Barlyq nysanda jol qaýipsizdigin qamtamasyz etý, belgilerdi jańartý, zamanaýı aıaldamalar ornatý jáne jol jıekterin nyǵaıtý sııaqty keshendi is-sharalar qarastyrylǵan. Oblys ákiminiń orynbasary Mıras Múlkáı merdigerlerge jumystardy sapaly ári ýaqytyly aıaqtaýdy tapsyrdy.
