Oral-Astana baǵytynda jańa poıyz qatynamaq
ORAL. QazAqparat - 1 maýsymnan bastap Oral-Astana, Astana-Oral baǵytynda jańa №257 jáne №258 poıyzdary qatynamaq. Bul týraly Oral vokzalynyń bastyǵy Qaıyrbolat Ǵaıneden málim etti, dep habarlaıdy «QazAqparat» tilshisi.
Onyń aıtýynsha, bir qýanyshtysy, bul poıyz Astananyń táýligine 35 myń jolaýshyny qabyldaı alatyn jańa vokzalyna toqtaıtyn bolady. Sonymen qatar burynnan bar №57 jáne №58 poıyzy da júredi, tek ol eski vokzalǵa aıaldaıdy. Oǵan qosa «Tulpar-Talgo» júrdek poıyzyn iske qosý da kún tártibinen túsken joq.
Aıta keteıik, esesine tehnıkalyq sebepterge baılanysty Almaty-Máskeý baǵytynda qatynaıtyn poıyzdyń joly qysqaryp, 1 maýsymnan bastap Saratovtan keri qaıtatyn bolady. Biraq onyń Qazaqstan aýmaǵyndaǵy jolaqysy ózgermeıdi.
