Oral - Astana baǵytymen ushqan FlyArystan ushaǵy qustarmen soqtyǵysyp qaldy
ASTANA. KAZINFORM – 26 qańtarda Oral - Astana baǵyty boıynsha FlyArystan FS 7366 áýe kompanııasynyń reısin oryndaǵan ushaq Oral qalasynyń áýejaıynan ushqan kezde qustarmen soqtyǵysqan.
Ushaq júıeleri men qozǵaltqyshtarynyń jumysynda aýytqýlar bolmaǵandyqtan, ekıpaj ushýdy jalǵastyryp, Astana qalasynyń áýejaıyna shtattyq rejımde qonady.
- Ushaq kelgennen keıin sol qozǵaltqyshtaǵy kompressor qalaqshalary men fıýzelıajda kóptegen zaqymdanýlar anyqtaldy. Sondaı-aq qustardyń qaldyqtary qozǵaltqyshta jáne basqa jerlerde tabyldy. Oral áýejaıynda osyndaı oqıǵalardy boldyrmaý maqsatynda qustardyń túrlerin anyqtaý úshin DNK-testileýge jiberiledi, - delingen Air Astana kompanııasynyń habarlamasynda.
Habarlamada kórsetilgendeı, 2024 jyly qustarmen soqtyǵysý deregi 2023 jylmen salystyrǵanda 30%-ǵa kóbeıgen. Atap aıtqanda, Air Astana kompanııalar toby 203 oqıǵa tirkepti.
Aıta keteıik, Aqtaýdaǵy áýe apatynan keıin eldegi ushaq sapasyna nazar aýdaryla bastady. Depýtattar saladaǵy kemshilikti atap, áýe kompanııalaryndaǵy shıkilikti ashyq aıtyp jatyr.