Oral-Aqtóbe jolynda kommertsııalyq júk kólikterden ǵana aqy alynady
Kompanııa baspasóz qyzmetiniń málimetinshe, Aqtóbe jáne Batys Qazaqstan oblystarynda ótken qoǵamdyq tyńdaýlarda aqyly joldardyń basty artyqshylyqtary talqylanǵan.
«Nurly jol» baǵdarlamasy jáne Uly Jibek jolyn jańǵyrtý jobasy sheńberinde zamanýı úlgide qaýipsiz joldar salýda. Kúre joldardyń sapasyn saqtap kútip ustaý úshin respýblıkanyń batys óńirlerinde jolaqysynyń ashyq júıesin engizý josparlanyp otyr.
«Oral jáne Aqtóbe qalalaryn, sondaı-aq Aqtóbe jáne Batys Qazaqstan oblystarynyń 20-dan astam eldi mekenin jalǵaıtyn jol da jaqynda aqyly bolady. Dálirek aıtqanda, jańa tehnologııany qoldana otyryp jáne zamanaýı halyqaralyq qaýipsizdik standartyna sáıkes salynǵan uzyndyǵy 281 shaqyrymdyq ýchaske.
Bul avtojolda testilik rejımde jol qozǵalysy qaýipsizdiginiń joǵary deńgeıin jáne jolǵa, onyń jabynyna jáne ilespe ınfraqurylymǵa turaqty qyzmet kórsetýdi qamtamasyz etýge múmkindik beretin baǵdarlamalyq-apparattyq keshen iske qosylady», delingen habarlamada.
«QazAvtoJol» UK» AQ ókilderi Aqtóbe jáne Batys Qazaqstan oblystarynyń Qobda, Shyńǵyrlaý men Syrym aýdandaryndaǵy qoǵamdyq tyńdaýlarda jergilikti halyqtyń qaýipsizdigin qamtamasyz etýdiń jańa júıesi men jumys qaǵıdaty týraly aıtyp berdi.
Mamandar «Oral-Aqtóbe» avtojolynda pılottyq rejımde jumys isteıtin 3 baqylaý arkasy men klıenttermen jumys júrgizý ortalyǵy ornatylǵanyn habarlady. Arkalarda ornatylǵan joǵary jyldamdyqty kamera aqyly ýchaske boıynsha avtomobılderdiń jyldamdyǵy men sanyn, joldaǵy jaǵdaıdy jáne t. b. tirkeıdi.
«Jolda tólem beketteri bolmaıdy, onyń ornyna yńǵaıly «ashyq» tólem júıesi qoldanylady. Jol boıynda artyq kedergi qoıylmaǵandyqtan keptelis bolmaıdy, bul qosymsha qaýipsizdikti qamtamasyz etedi jáne sapar ýaqytyn qysqartady.
Jol júrý tólemi qolma-qol aqshasyz tásilmen jáne aldyn ala tólem boıynsha júrgiziledi. Bul da qaýipsizdik saıasatynyń bir bóligi, óıtkeni júrgizýshiler aqy tóleýge nazaryn aýdarmaı, alańsyz kólikti júrgize beredi.
Aıta ketý kerek, jeńil kólik ıeleri Oral-Aqtóbe jolyn tegin paıdalanady. Jol júrý aqysy tek kommertsııalyq júk kóliginen alynatyn bolady. Jınalǵan qarajat joldyń ózin-ózi qarjylandyrýyn ǵana emes, sonymen qatar joldaǵy qaýipsizdiktiń joǵary deńgeıin ustap turatyn servıs qyzmetin de qamtamasyz etedi», delingen habarlamada.
Mamandardyń aıtýynsha, «Oral-Aqtóbe» jolynyń aqyly ýchaskesindegi apparattyq-baǵdarlamalyq keshen arqasynda ózge joldarmen salystyrǵanda neǵurlym yńǵaıly jáne qaýipsiz bolady.
