Oral ákiminiń orynbasary 648 myń teńge aıyppul arqalady
ASTANA. KAZINFORM — Oral ákimdigi jobalaý uıymdarymen básekelestikke qarsy kelisimder jasaǵan. Zań buzýshylyqqa jol bergen qala ákiminiń orynbasaryna 648 myń teńge aıyppul salyndy.
Batys Qazaqstan oblysy prokýratýrasynyń málimetinshe, tekserý barysynda Oral qalasynyń Turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi jobalaý uıymdarymen jobalaý-smetalyq qujattamany tegin ázirleý týraly memorandýmdarǵa qol qoıǵany anyqtalǵan.
Keıin bul jobalar bıýdjet qarajaty esebinen iske asyrylǵan. Prokýratýra muny básekelestikti qorǵaý zańnamasyn buzý dep tanydy.
Zań buzýshylyqqa jol bergen Oral ákiminiń orynbasary Ákimshilik quqyq buzýshylyq týraly kodekstiń 163-babynyń 1-bóligi boıynsha jaýapqa tartylyp, 648 myń teńge aıyppul tóledi.
Eske salaıyq, buǵan deıin Qyzylordada ınvestorǵa zańsyz shara qoldanǵan basqarma basshysyna aıyppul salynǵanyn habarlaǵan edik.
