Oral ákimdiginiń sheneýnigi memlekettik úı qorynan áıeline páter bergizgen

ORAL. KAZINFORM — Oral qalasy ákimi apparaty biryńǵaı memlekettik-quqyqtyq bóliminiń basshysy qyzmetin atqaratyn Álıhan Myńjasarovtyń qyzmet babyn paıdalanyp, nekede turatyn áıeli Almıra Qarasaevaǵa páter alyp bergeni belgili boldy.

BQO ákiminiń baspasóz qyzmetinen málim etkendeı, bul zańbuzýshylyqty óńir basshysy qurǵan jumys toby qyzmettik tekserý barysynda bıylǵy 28 maýsymda anyqtaǵan.

«Jumys tobynyń qorytyndysy laýazymdy qyzmetkerdiń is-áreketine tıisti quqyqtyq baǵa berý úshin Oral qalasy prokýratýrasyna joldandy. Sonymen qatar qazirgi kezde oblys ákiminiń tapsyrmasyna sáıkes Oral qalasy ákimdigi memlekettik turǵyn úı qorynan páter berýdiń zańdylyǵyn tekserý úshin osyndaı derekterdi anyqtaý jáne oǵan jol bermeý maqsatynda jumys tobyn qurdy», -dep habarlady vedomstvodan. 

Aıta keteıik, Sybaılas jemqorlyqqa qarsy is-qımyl týraly zańnyń 15-babyna sáıkes jaýapty memlekettik laýazymdy atqaratyn adamdarǵa, memlekettik fýnktsııalardy oryndaýǵa ýákilettik berilgen adamdarǵa jáne soǵan teńestirilgen adamdarǵa, laýazymdy adamdarǵa, eger múddeler qaqtyǵysy oryn alǵan bolsa, laýazymdyq mindetterin júzege asyrýǵa tyıym salynady.