Oraq naýqany: bıdaıdyń túsimdiligi gektaryna 35 tsentnerge jetti
ASTANA. KAZINFORM — Quryltaı saılaýy kúni Aýyl sharýashylyǵy mınıstri Aıdarbek Saparov birqatar aýyl sharýashylyǵy kásipornyna baryp, egin naýqanynyń barysymen jáne egin jınaý qarqynymen tanysty.
Vedomstvo baspasóz qyzmetiniń málimetinshe, jumys sapary aıasynda mınıstr barǵan nysandardyń biri — ósimdik sharýashylyǵyna mamandanǵan «SERVIS JARS» seriktestigi.
Sharýashylyqqa qarasty alqaptyń jalpy kólemi 9 myń gektardan asady. Dándi daqyldar alqabynyń basym bóligin bıdaı quraıdy. Sonymen qatar munda arpa men jasymyq ósiriledi. Sharýashylyqta naýqan josparǵa saı mejeli merzimde joǵary uıymdastyrýshylyqpen qarqyndy júrgizilip jatyr. Búginde kúzdik bıdaıdyń túsimdiligi gektaryna 35 tsentnerdi, jazdyq bıdaı — 25, arpa — 28 , jasymyqtyń túsimdiligi — 21 tsentnerdi quraıdy. Bul zaman talabyna saı qoldanylyp otyrǵan agrotehnologııalardyń joǵary tıimdiligin kórsetedi.
Atalǵan seriktestik bazasynda mınıstr egin jınaý naýqanyna qatysyp jatqan birneshe sharýashylyqtyń kombaınshylarymen kezdesti. Aıdarbek Saparov oraq naýqany agrarshylardan barynsha jedeldikti, joǵary deńgeıdegi uıymdastyrýshylyqty jáne is-qımyldyń úılesimdiligin talap etetinin atap ótti.
Sondaı-aq mınıstr mehanızatorlardyń kásibıligi men jaýapkershiligin atap ótip, egin jınaý naýqanyn ýaqtyly aıaqtaý jáne ósirilgen ónimdi saqtaý kóp jaǵdaıda olardyń kúndelikti eńbegine, tájirıbesi men jedel áreketine baılanysty ekenine toqtaldy.
Mınıstr oraq naýqanyna qatysyp jatqan jumysshylar úshin laıyqty ári qaýipsiz eńbek jaǵdaılaryn jasaýdyń mańyzdylyǵyna da basa kóńil bóldi.
— Oraq naýqany — agrarshylar úshin eń jaýapty kezeńderdiń biri. Oǵan qatysýshylardyń barlyǵynyń úılesimdi jumysy naqty bir sharýashylyqtyń nátıjesine ǵana emes, eldiń azyq-túlik qaýipsizdigin qamtamasyz etýge salanyń qosatyn jalpy úlesine de áser etedi. Sondyqtan tehnıkany barynsha tıimdi paıdalaný, agrotehnıkalyq merzimderdi qatań saqtaý jáne jumysshylarǵa qajetti jaǵdaı jasaý mańyzdy, — dep atap ótti mınıstr.
Osyǵan deıin Qazaqstanda egin jınaý naýqany bastalǵanyn, qaı óńirde ónimdilik joǵary ekenin jazǵanbyz.
