Oracle Qazaqstanda JI ınfraqurylymyn damytýǵa qatysady

ASTANA. KAZINFORM – QR Jasandy ıntellekt jáne tsıfrlyq damý mınıstrligi men Oracle kompanııasy jasandy ıntellekt, joǵary ónimdi esepteýler jáne «bultty» tehnologııalar salalaryndaǵy yntymaqtastyqty damytýǵa baǵyttalǵan ózara túsinistik týraly memorandýmǵa qol qoıdy.

Qol qoıý rásimi AQSh-ta ótken C5+1 formatyndaǵy bıznes-konferentsııa aıasynda uıymdastyryldy. Bul is-shara Ortalyq Azııa elderi men AQSh arasyndaǵy óńirlik yntymaqtastyqty keńeıtýge, sondaı-aq ekonomıkalyq jáne tehnologııalyq damýdy qoldaýǵa baǵyttalǵan.

Memorandým sheńberinde taraptar Qazaqstan aýmaǵynda Oracle kompanııasynyń pılottyq jasandy ıntellekt ınfraqurylymyn ornalastyrý múmkindigin baǵalaý, tıisti testileý jumystaryn júrgizý jáne bultty derekter ortalyqtaryn kezeń-kezeńimen damytý áleýetin zertteý baǵytynda ózara is-qımyl ornatýdy josparlap otyr. Sondaı-aq qoldanbaly jasandy ıntellektke negizdelgen pılottyq jobalardy iske asyrý máseleleri de qarastyrylǵan.

Yntymaqtastyq aıasynda kadrlyq áleýetti arttyrýǵa baǵyttalǵan oqý jáne sertıfıkattaý baǵdarlamalaryn ázirleý, birlesken ǵylymı-zertteý jobalaryn júzege asyrý jáne Qazaqstanda Oracle quzyretter ortalyǵyn qurý múmkindigi qarastyrylyp jatyr. Taraptar jasandy ıntellektti damytý salasyndaǵy retteý men etıkalyq máseleler boıynsha da turaqty dıalog ornatýǵa nıetti.

QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev atap ótkendeı, bul yntymaqtastyq eldiń ulttyq JI ınfraqurylymyn damytýǵa jáne tsıfrlyq ekojúıeni nyǵaıtýǵa serpin beredi.

«Oracle kompanııasymen áriptestik Qazaqstannyń ulttyq jasandy ıntellekt ınfraqurylymyn jáne tsıfrlyq ekojúıesin damytýǵa yqpal etedi. Bul elimizdiń tsıfrlyq ekonomıkasyn qalyptastyrý úshin berik negiz qurý jáne tehnologııalyq ınnovatsııalardy ilgeriletý jónindegi bizdiń ustanymymyzdy kórsetedi», – dedi ol.

Óz kezeginde Oracle kompanııasynyń memlekettik organdarmen jumys jónindegi basqarýshy dırektory Ellıson O’Braıen Qazaqstannyń jasandy ıntellektke qatysty ulttyq strategııasyn iske asyrýǵa qoldaý bildirýge daıyn ekenin aıtty.

«Oracle Qazaqstannyń jasandy ıntellektige qatysty ulttyq strategııasyn iske asyrýdy qoldaýǵa ázir. Bizdiń tehnologııalar men saraptamalyq tájirıbemiz tsıfrlyq transformatsııany jedeldetýge jáne túrli salalarda ınnovatsııalardy yntalandyrýǵa múmkindik beredi», – dedi ol.

Aıta keteıik, Almatyda JI boıynsha halyqaralyq olımpıada bastaldy.