«Ór Torǵaı - erlik mekeni» atty ekspedıtsııa Arqalyq qalasynda kezdesý uıymdastyrdy
ASTANA. QazAqparat - 1916 jylǵy ult-azattyq kóterilisine 100 jyl tolýyn oraı uıymdastyrylǵan «Ór Torǵaı - erlik mekeni» atty ekspedıtsııa músheleri Arqalyq qalasyndaǵy Ó.Jánibekov atyndaǵy tarıhı ólketaný murajaıynda boldy.
Murajaıda ekspedıtsııa músheleri men Arqalyq qalasynyń qurmetti azamaty, ólketanýshy Shóptibaı Baıdildın bastaǵan shejireshi aqsaqaldary kezdesý uıymdastyrdy. Oǵan jergilikti BAQ ókilderi de qatysty.
Basqosýda sóz alǵan atalmysh ekspedıtsııany uıymdastyrýshy toptyń múshesi Jomart Túbekbaev sapardyń mańyzdylyǵyna toqtaldy.
«Bıyl 1916 jylǵy ult-azattyq kóterilisine 100 jyl tolyp otyr. Osyǵan baılanysty el tarıhyn búginge qoǵamǵa nasıhattap, jastarǵa uǵyndyrsaq degen nıetimiz bar. Búgingi kúni kóp adamdar ult-azattyq kóterilisine qatysty A. Imanov, Á. Jangeldın esimderin bilse de, sol urystyń bel ortasynda júrip qol bastaǵan Keıki batyr, Ábdiǵappar Janbosynov, Ospan Sholaquly sekildi tarıhı tulǵalardy bile bermeıdi. Sondyqtan da biz babalar erligin ulyqtap, eske alyp, negizgi oqıǵalar bolǵan jerlerdi aralaı otyryp, tarıhı oryndarǵa taǵzym jasap, sol arqyly dúbirge toly shejireli tarıhty basynan keshken, kıeli Torǵaı jerin tanyp-bilý maqsatynda «Ór Torǵaı - erlik mekeni» atty ekspedıtsııany uıymdastyryp otyrmyz», dep atap ótti Jomart Túbekbaev.
Sonymen birge jıyn sońynda tarıhı qundy muraǵattarǵa toly murajaıdy kelýshiler tańdanyspen aralap shyqty.
Esterińizge sala keteıik, ekspedıtsııa músheleriniń bir aptaǵa mejelengen sapary barysynda eki myń shaqyrym joldy basyp ótip, tarıhı mańyzy zor otyzdan astam nysanǵa soǵyp, áıgili Dýlyǵaly meshitiniń basynda jezqazǵandyq delegatsııamen jolyǵý josparlanǵan. Sondaı-aq, Ábdiǵapar hannyń qany tógilgen Záýre qopasy men Keıki týǵan Baıtumaǵa qonysyna belgi qoıylmaq. Ekspedıtsııaǵa demeýshilik jasaǵan ári bastamashy bolyp uıymdastyrǵan - «Torgay expedition» tobynyń ultjandy, belsendi azamattary.
Baqytjol Kákesh
