ÓR Olıı Májilisiniń delegatsııasy Astanadaǵy ózbek etnomádenı ortalyǵymen tanysty

Astana qalasyndaǵy Dostyq úıindegi kezdesýge QR Parlament Májilisi tóraǵasynyń orynbasary Vladımır Bojko, Astana qalasy ákiminiń orynbasary Ermek Amanshaev, Qazaqstan Respýblıkasyndaǵy Ózbekstan Respýblıkasynyń Tótenshe jáne Ókiletti Elshisi Saıdıkram Nııazhodjaev, Ózbekstan Respýblıkasynyń Olıı Májilis spıkeri Nýrdınjon Ismoılov qatysty. Kezdesýdiń maqsaty - Qazaqstandaǵy Ózbekstan jyly aıasynda Ózbekstan Respýblıkasynyń Olıı Májilisi zań shyǵarý palatasynyń delegatsııasyn QHA, elordadaǵy Dostyq úıi men Astana qalasyndaǵy ózbek etnomádenı ortalyǵynyń qyzmetimen tanystyrý boldy.

«Qurmetti áriptester! Búgin bizde qonaqta baýyrlas elimizdiń, bizdińshe aıtqanda Májilisi - Ózbekstan Respýblıkasynyń Olıı Májilis spıkeri Nýrdınjon Ismoılov myrza birshama qonaqtarmen kelip otyr. Jańa ǵana Astana qalasynyń ákimdiginde qala ákimi Baqyt Turlyhanulymen úlken kezdesý boldy. Ol jerde ózara yntymaqtastyq boıynsha óte mańyzdy máseleler talqylandy.

Nýrdınjon myrza, Astana qalasyndaǵy ózbek etnomádenı ortalyǵymen tanysyp otyrsyz. Bul ortalyq alǵashqylardyń biri bolyp ashylǵan. Ortalyq 2007 jyldyń sáýir aıynda ashylǵan edi. Ózbek etnomádenı birlestigi eń belsendi ortalyqtardyń biri desem artyq aıtqandyǵym emes. Bıyl Astana qalasynyń 20 jyldyǵyn merekelesek, ótken jyly shaharymyzda EKSPO kórmesi ótken edi. Osynaý aıtýly sharalardyń bárinde ózbek etnomádenı birlestigi belsendi atsalysyp keledi», - dedi kezdesý barysynda qala ákiminiń orynbasary Ermek Amanshaev.

Óz kezeginde Ózbekstan Respýblıkasynyń Olıı Májilis spıkeri Nýrdınjon Ismoılov Astanadaǵy ózbek etnomádenı ortalyǵyna úlken qoldaý kórsetilip otyrǵanyn atap ótti.

«Meniń bilýimshe, elordadaǵy ózbek etnomádenı ortalyǵyna qarjylyq ta, uıymdastyrýshylyq ta úlken qoldaý kórsetilip keledi. Osy úshin sizderge rahmet aıtqymyz keledi», - dedi Nýrdınjon Ismoılov.

Kezdesý kezinde baýyrlas elden kelgen meımandarǵa arnalyp kontsert qoıyldy.