ÓR DSM: Ózbekstanda COVID-ke qarsy vaktsınalaýdan keıin birde-bir ólim tirkelgen joq
Mınıstrlik ókili áleýmettik jelilerde koronavırýske qarsy ekpe saldyrtqannan keıin oryn alǵan ólim nemese densaýlyq nasharlaý oqıǵalary týraly taralǵan habarlamalarǵa qatysty túsiniktemesin berdi.
«Áleýmettik jelilerde «Ol vaktsına saldyrtqan soń qaıtys boldy» nemese «Onyń jaǵdaıy vaktsına saldarynan nasharlaǵan» atymen salynǵan beıneúndeýlerdi zerttegen arnaıy jumys toptary qurylǵan. Zertteý qorytyndysy janama áserlerdiń birde bireýiniń vaktsınaǵa qatysy joq ekenin rastady. Búginde Ózbekstanda COVID-19 vırýsyna qarsy vaktsınalardan birde bir ólim oqıǵasy nemese kúrdeli janama áser alý tirkelgen joq», - dep málimdedi S.Ýbaıdýllaeva.
Maman vaktsınalar nusqaýlyqtarynda janama áser tizimi jazylǵanyn, sonyń ishinde ekpe saldyrtqannan keıin bir saǵattyń ishinde paıda bolatyn túrli allergııalyq reaktsııalar bar ekenin atap ótti.
«Ekpe saldyrtýǵa qarsy kórsetilimi bar patsıentterge vaktsına salynbaıdy. Patsıentterge ekpe saldyrtqannan keıin belgili bir ýaqyt medıtsınalyq mekemede kúte turý keńes etiledi. Anafılaksııalyq shok nemese aýyr alllergııalyq áser paıda bolǵan jaǵdaıda dárigerler dereý kómek kórsete alady. Janama áserlerdiń kóbi jeńil ótedi, bul vaktsınanyń patsıentterdiń ımmýndyq júıesin rettep jumys isteıtinin bildirtedi», - dep atap ótti spıker.
Eske sala ketsek, Ózbekstanda ekpe naýqany 1 cáýirde bastalǵan. Vaktsınalaý tórt preparatpen júzege asyrylýda: eýropalyq AstraZeneca, qytaı-ózbek ZF-UZ-VAC2001, reseılik «Spýtnık-V» jáne 1 tamyzdan bastap amerıkandyq Moderna vaktsınasy. Ekpe naýqany bastalǵaly 2 mıllıon ózbekstandyq azamat koronavırýsqa qarsy vaktsınalaýdyq tolyq kýrsyn ótti.