Oppozıtsıonerler Bangkok ortalyǵynda jol qozǵalysyna shekteý qoıdy
ASTANA. 13 qańtar. QazAqparat - Búgin Úkimetke qarsy sherýshiler Taıland astanasynyń ortalyǵynda jol qozǵalysyna shekteý qoıýdy bastady.
Bangkok qalasynyń geografııalyq ortalyǵy sanalatyn Jeńis monýmenti alańyndaǵy kóshe qıylystary jabyq, dep habarlady Reseıdiń «Jańalyqtar» aqparat agenttigi.
Agenttiktiń aqparatyna qaraǵanda, Bangkoktyń ulttyq mańyzy bar barlyq avtojoldarynda qozǵalysqa tek bir ǵana jolaq ashyq, ázirshe odan qoǵamdyq, sondaı-aq jeke kólikter de ótkizilýde. «Bir saǵattyń ishinde biz bul jolaqty da jaýyp bastap, tek qana qoǵamdyq kólikterdi ótkizetin bolamyz», - deıdi oppozıtsııalyq Halyqtyq demokratııalyq reformalar keńesiniń kúzet otrıady jasaqtarynyń biri.
Kúzetshiler Jeńis monýmenti tóńiregindegi alańǵa metall tosqaýyldar qoıyp, sherýshilerdiń kólikterin polıtsııaǵa kedergi keltiretindeı etip ornalastyrýda.
Polıtsııanyń derekterine qaraǵanda, monýment aldyndaǵy sherýshilerdiń sany ázirshe 3 myńnan aspaıdy. Degenmen adamdar alańda ornalasqan metro stansasy arqyly kelip jatyr. Bul jerde oppozıtsııa serkeleri de júr. Olardyń qatarynda Halyqtyq demokratııalyq reformalar keńesiniń bas hatshysy Sýthep Thyaksýban da bar. Aıtýynsha, sherýshiler qatary tolyqqannan keıin olar qarjy mınıstrligi men ulttyq bıýdjet bıýrosy ǵımaratyna baryp, bul mekemelerdiń jumysyn toqtatýǵa árekettenbek.
