Operatsııanyń alǵashqy táýliginde Irannyń 1000-nan astam nysany joıyldy

ASTANA. KAZINFORM — AQSh-tyń Ortalyq qolbasshylyǵy (CENTCOM) «Epıkalyq qahar» operatsııasynyń alǵashqy 24 saǵatynda Irannyń 1000-nan astam nysany joıylǵanyn habarlady. Bul týraly VVS jazdy.

CENTCOM málimetine sáıkes, operatsııanyń alǵashqy táýliginde Iran aýmaǵyndaǵy 1000-nan astam baǵytqa soqqy jasalǵan.

Qolbasshylyqtyń resmı esebinde operatsııa barysynda qoldanylǵan amerıkalyq áskerı quraldar atalǵan. Olardyń qatarynda stels-bombalaýshy ushaqtar, ushqyshsyz ushý apparattary (drondar), joıǵysh ushaqtar jáne zymyranǵa qarsy qorǵanys keshenderi bar.

Málimdemede Iranǵa jasalǵan soqqylardyń nysanalary da kórsetilgen. Olardyń ishinde basqarý jáne baqylaý ortalyqtary, ballıstıkalyq zymyrandar ornalasqan oryndar, sondaı-aq Irannyń Islam revolıýtsııasy saqshylar korpýsynyń birikken shtaby bar ekeni aıtylǵan.

Bul aqparat Izraıl qorǵanys armııasynyń (TsAHAL) operatsııanyń alǵashqy kúni «óte eleýli jetistikterge» qol jetkizilgeni týraly málimdemesimen úndesip otyr.

Eske sala ketsek, Izraıldiń batysyndaǵy, Ierýsalımge jaqyn ornalasqan Beıt-Shemesh qalasyna jasalǵan zymyran soqqysy saldarynan 9 adam kóz jumdy.