Operatsııa kezinde naýqastyń ómirine kim jaýapty
ASTANA. KAZINFORM — Adam ómirine arasha túsý — anestezıolog-reanımatologtardyń kúndelikti jumysy. Olar operatsııa jasamasa da, otanyń qaýipsiz ári sátti ótýine tikeleı jaýap beredi. Naýqastyń jaǵdaıyn operatsııaǵa deıin de, keıin de baqylaýda ustaıdy.
Biraq bul mamandyqty ekiniń biri tańdap, táýekel ete bermeıdi. Nelikten? Kazinform tilshisi QR Prezıdenti Іs basqarmasy Medıtsınalyq ortalyǵyna baryp, osy qyzmettiń qyr-syrymen tanysyp qaıtty.
Bul aýrýhanada bıyl 5 myńnan astam operatsııa jasalǵan. Biraq birde-bir ota anestezıolog-reanımatologtardyń qatysýynsyz ótpeıdi. Óıtkeni naýqastyń jaǵdaıyn sekýnd saıyn osy mamandar baqylaıdy.
Aýrýhanada 42 anestezıolog jumys isteıdi. Sonyń biri — Saıat Bıkıbaev. Ol bul salada 13 jyldan beri eńbek etip keledi. Kúndelikti jumysy naýqasty ota aldynda tekserýden bastalady. Operatsııa kezinde de onyń tynys alýyn, júrek soǵysyn úzdiksiz baqylaýda ustaıdy. Tipti naýqastyń narkozdan oıanǵan sátin de kirpik qaqpaı kútip otyrady.
— Men Reseıdiń Sankt-Peterbýrg qalasyndaǵy Áskerı-medıtsınalyq akademııany támamdadym. Osy aýrýhanada úsh jyldan beri eńbek etip kelemin. Buǵan deıin túrli áskerı gospıtaldarda qyzmet atqardym. Jyl saıyn bizdiń bólimde 1500-den astam naýqas em qabyldaıdy. Onyń ishinde reanımatsııalyq kómekke muqtaj, jaǵdaıy aýyr patsıentterdiń sany 700–800 adamǵa jetedi. Bárine qoldan kelgenshe kómek kórsetemiz, — dedi QR Prezıdenti is basqarmasy medıtsına ortalyǵy aýrýhanasynyń anestezıolog-reanımatolog dárigeri Saıat Bıkıbaev.
Dárigerdiń aıtýynsha, shetelde reanımatologııa men anestezıologııa eki bólek mamandyq retinde jeke oqytylady. Al Qazaqstanda bul baǵyttar bir mamandyq retinde biriktirilgen.
— Bizdiń mamandyq shyn máninde eki baǵyttan turady. Reanımatolog naýqastardyń jaǵdaıyn turaqtandyrsa, anestezıolog operatsııa kezinde aýyrsynýdy basyp, qaýipsizdikti qamtamasyz etedi. Alaıda shuǵyl jaǵdaılarda, anestezıologqa reanımatologııa baǵytyndaǵy daǵdylar da qajet bolady. Narkoz berip qana qoımaı, naýqastyń qan qysymyn baqylap, qajet jaǵdaıda qan komponentterin quıady. Ókpeni jasandy jeldetý apparatyn qoldanady jáne shok jaǵdaıynan shyǵarýǵa kómektesedi, — dedi ol.
Saıat Bıkıbaev, 12 jyldyq eńbek jolynda talaı naýqasqa kómek kórsetip, kúrdeli jaǵdaılarmen betpe-bet kelgen. Sonyń biri — sırek kezdesetin Laıell sındromyna shaldyqqan naýqasty emdeý tájirıbesi.
Laıell sındromy — sırek kezdesetin, biraq óte aýyr ótetin allergııalyq-ımmýndyq reaktsııa. Kóbine keıbir dári-dármekterdi qabyldaǵannan keıin paıda bolady.
— Aýrýdyń negizgi belgisi — teriniń sypyrylyp túsýi edi. Al bizge kelgen naýqasta teriniń 90 paıyzdan astamy zaqymdandy. Arnaıy oqshaýlanǵan palatada emdep, dene temperatýrasyn turaqty baqyladyq. Kún saıyn tańý júrgizilip, birneshe mamannyń qatysýymen konsılıým ótti. Teri zaqymdanǵandyqtan ınfektsııa qaýpi óte joǵary boldy. Soǵan qaramastan, keshendi em men mamandardyń birlesken jumysynyń arqasynda naýqas saýyǵyp shyqty, — dedi anestezıolog-reanımatolog.
Ol dertti emdeýde dári-dármekpen qatar naýqasqa kórsetiletin kútim de sheshýshi ról atqaratynyn aıtady. Durys kútim men úzdiksiz baqylaý asqynýdyń aldyn alyp, naýqastyń saýyǵýyna yqpal etedi. Osyndaı sátterde anestezıolog-reanımatologtardyń kásibı biliktiligi men eńbeginiń mańyzy aıqyn kórinedi.
— Jaqynda birneshe aı boıy komada jatqan naýqasty úıine shyǵaryp saldyq. Bas mı baǵanyna qan quıylǵannan keıin onyń jaǵdaıy óte aýyr boldy. Onyń saýyǵyp shyǵýyna der kezinde kórsetilgen emmen qatar, meıirbıkelerdiń tynymsyz kútimi de sheshýshi ról atqardy. Sebebi naýqasqa táýlik boıǵy kútim men turaqty baqylaý da asa mańyzdy, — dedi ol.
Dárigerdiń naýqastarynyń biri — 67 jastaǵy Erlan Badashev. Josparly tekserý barysynda onyń qan tamyrlarynda aqaý anyqtalyp, shýnttaý operatsııasy jasalǵan. Naýqastyń aıtýynsha, ol dárigerlerge tolyq senim artqan. Nátıjesinde ota sátti ótip, búginde densaýlyǵy jaqsy.
— Árıne, qobaljý boldy. Biraq anestezıolog dárigerler ázil aıtyp, kóńilimdi aýlady. Jyly qarym-qatynastary qatty unady. Qalaı uıyqtap ketkenimdi de baıqamaı qaldym. Bul — olardyń kásibıliginiń bir belgisi dep oılaımyn, — dedi naýqas.
Anestezıolog-reanımatologtar — otaǵa túsken adamnyń jer betindegi perishtesi. Olar ár sekýndty qalt jibermeıdi. Qıyn sátte demeý berip, ómirine arasha túsedi. Saıat Bıkıbaevtyń aıtýynsha, bul mamandyq úlken jaýapkershilik pen sabyrlylyqty talap etedi.
— Bizdiń jumysymyz úlken psıhoemotsııalyq júktememen baılanysty. Keıde sharshap, jumysqa barǵyń kelmeıtin sátter bolady. Biraq aýrýhanada bireýdiń ata-anasy nemese balasy qıyn jaǵdaıda seni kútip otyrǵanyn túsinesiń. Sol sátte bar kúshińdi salyp, kómek berýge mindettisiń.
Aıta keteıik, jaqynda jambyldyq dárigerler isikti alyp tastap, naýqastyń tómengi ernin qalpyna keltirgen edi.
