Operatorlar poshta jóneltilimindegi tyıym salynǵan zattardy anyqtaýǵa mindetteledi
ASTANA. QazAqparat - 2019 jyldan bastap operatorlar poshta jóneltilimindegi tyıym salynǵan zattar men buıymdardy anyqtaýǵa mindetti bolady. Ol úshin operatorlar arnaıy tehnıkalyq quraldardy, qurylǵylar men beınebaqylaý júıesin qoldanady. Bul týraly búgin Parlament Májilisinde «Poshta týraly» zań jobasyn tanystyrǵan Investıtsııalar jáne damý vıtse-mınıstri Sáken Sársenov málim etti.
«Poshta baılanysy men jóneltilimderi salasynda qaýipsizdik máselelerin erekshe qozǵap ótken jón. Qazirgi ýaqytta poshta operatorlary poshtalyq qaýipsizdikti uıymdastyrý, poshta jóneltilimderin qorǵaý jáne saqtaý, poshta salasyndaǵy qupııany qamtamasyz etý boıynsha sharalardy tolyq kólemde júzege asyra almaı keledi. Qoldanystaǵy zańnamada qaýipsizdikti qamtamasyz etetin normalar men mehanızmder joq, osynyń saldarynan ómirge qaýipti zattar men buıymdardyń kóbeıýi týyndap otyr», - deıdi vıtse-mınıstr. Onyń aıtýynsha, atalǵan máselege baılanysty zań jobasymen paıdalanýshylardyń jáne poshta operatory jumyskerleriniń densaýlyǵy, ómir qaýipsizdigin qamtamasyz etýge baǵyttalǵan sharalardy kúsheıtý usynylady. Bul rette poshta operatorlary jóneltý úderisi kezinde poshta jóneltilimindegi tyıym salynǵan zattar men buıymdardy tehnıkalyq quraldardy, qurylǵylardy jáne beınebaqylaý júıesin qoldana otyryp anyqtaýǵa mindetti bolady. Atalǵan norma poshta operatorlary tarapynan tıisti shyǵyndardy kózdeıtindikten, onyń kúshine enýi 2019 jylǵy 1 qańtar dep kórsetilgen. «Sondaı-aq jańa zań jobasyna sáıkes Ulttyq poshta operatoryna poshta qaýipsizdigi júıesin qurý boıynsha mindettemeler júkteledi jáne jeke kúzet uıymdaryn qurý quqyǵy beriledi. Bul poshta jóneltilimderine ruqsatsyz qol suǵýdan saqtaýǵa jáne poshta jóneltilimderi men aqshalardy joǵaltýdyń nemese urlaýdyń aldyn alýǵa múmkindik beredi», - dedi S.Sársenov.
