Operatorlar Pavlodardaǵy 10 aýyldy ınternetke jáne uıaly baılanysqa qosýdan bas tartyp otyr

PAVLODAR. KAZINFORM - Pavlodar oblysy boıynsha 10 eldi mekende ınternet jáne uıaly baılanys joq. Bul jaǵdaı olardaǵy halyq sanynyń azdyǵynan, soǵan oraı operatorlar ózderiniń jabdyqtaryn ornatýdy tıimsiz sanaýynan týyndap otyr.

Óńirlik tsıfrlyq tehnologııalar basqarmasynyń dereginshe, aımaq boıynsha 342 eldi mekende ınternet pen uıaly baılanys qoljetimdi. Alaıda operatorlar 10 aýylǵa óz jabdyqtaryn ornatýdan bas tartqan. Ondaı eldi mekender Ekibastuzdyń aýyldyq aımaǵynda, Maı, Baıanaýyl, Ertis aýdandarynda ornalasqan. Baılanys qyzmetin kórsetýshiler halqy az jerlerde baılanys munarasyn ornatý tıimsiz dep sanaıdy.

- «Qoljetimdi ınternet» ulttyq jobasy halyq sany 250-den kem emes eldi mekenderdi qamtıdy. Operatorlar turǵyndar sany az aýyldarda jumys isteýden bas tartyp otyr. Olar munara turǵyzý, jabdyqtardy ornatý qarjylyq turǵydan tıimsiz ekenin aıtady. Stansalar belgili kólemde elektr qýatyn tutynady, onda stansany salqyndatyp turatyn arnaıy jabdyqtar ornatylady. Buǵan qosa mamandary ýaqyt saıyn shyǵyp, stansalarǵa qyzmet kórsetýi qarastyrylǵan keste qurylǵan. Saıyp kelgende osynyń barlyǵy qarjylyq turǵydan aýyr tıetinin aıtyp otyr,-deıdi Pavlodar oblysy tsıfrlyq tehnologııalar basqarmasynyń basshysy Aǵybaı Ámirın.

Basqarma basshysy másele týyndap turǵan aýyldardy jaqyn jyldary ınternetpen jáne uıaly baılanyspen qamtamasyz etý qarastyryla beretinin jetkizdi.

«Qazirgi ýaqytta elimizde halyq sany 100 adamdy quraıtyn aýyldarǵa da aýyzsý júıesi tartylyp jatyr. Sondyqtan bul másele Úkimet tarapynan jaýapsyz qalmaıdy degen úmit zor. Uıaly baılanys operatorlary álgi aýyldarda radıoreleılik baılanysta qoldanylatyn jabdyqtardy ornatsa bolady. Ol Wi-fi sıgnalyn ulǵaıtqysh sekildi jumys isteıtin qurylǵy. Onyń quny stansalarǵa qaraǵanda áldeqaıda arzanǵa túser edi»,-deıdi ol.

Atalǵan 10 aýyldyń tizimi búginde jaýapty mınıstrlikke jiberilip qoıǵan.

Eske sala keteıik, Qazaqstanda 26 mln uıaly baılanys abonenti tirkelgen.