Operalııa-2024: 9 eldiń óner juldyzdaryn toǵystyrǵan festıval
ASTANA. KAZINFORM — Elordada ótken «Operalııa-2024» festıvali bıyl erekshe mazmunǵa ıe boldy. Búgin «Astana opera» sahnasynda Grýzııa, Ispanııa, Italııa, Qazaqstan, Qytaı, Reseı, Tájikstan, Ýkraına men Chehııanyń tanymal solısteri, hory jáne sımfonııalyq orkestriniń qatysýymen Gala-opera ótti. Baǵdarlamada álemdik jáne ulttyq opera klassıkasynan arııalar men dýetter bar.
– «Operalııa» aıasynda ótken qoıylymdarǵa ártúrli elderden kelgen mýzykanttar men ánshiler osy festıvalda bas qosyp otyr. Biz úshin ol úlken mártebe men maqtanysh. Bul «Operalııa» festıvali tek qana mýzykalyq festıval emes, bul halyqtar arasyndaǵy dostyq pen mádenı almasýdyń nyshany dep bilemiz. Soǵan oraı, Qazaqstan men Italııa arasynda bıyl memorandýmǵa qol qoıǵan bolatyn. Bir sózben aıtqanda, bul memorandým qazaq mádenıetine álemdik mádenı keńistikte oıyp turyp oryn alýǵa úlken múmkindik berip tur. Búgingi Gala operada álemdik jaýharlardyń kórinisi men ulttyq operalyq kórinister usynyldy. Biz ulttyq operalarǵa erekshe kóńil bólemiz, onyń orny óte zor, qaı shyǵarmany alsaq ta, tarıhy tereńde jatyr. Árqıly oqıǵalarǵa toly úlken ıdeıalardy meńzep, mýzykasy halqymyzdyń rýhyn, tarıhyn, mádenıetin kórsetedi. Sondyqtan álemdik búgingi shýaqty Italııadan kelgen meımandarymyz óz ónerlerin pash etip, umytylmastaı keshten úlken áser qaldyrǵanyna senimdimin, - deıdi «Astana Opera» teatrynyń rejısseri Erenbaq Toıkenov baspasóz konferentsııasynda.
Festıval teatrlandyrylǵan shoýmen ashyldy. Onda operalyq nómirlermen qatar, opera men balet óneriniń ozyq úlgileri kórsetildi.
Festıval aıasynda qazaq kompozıtory M. Tólebaevtyń «Birjan – Sara» klassıkalyq týyndysy qoıyldy. Dj.Pýchchınıdiń «Týrandot» áıgili operasyn grýzııalyq tenor Georgıı Onıanı, ýkraınalyq soprano Oksana Kramareva, cheh sopranosy Lıbýshe Santorısova qoıdy. Sonymen qatar, G. Donıtsettıdiń «Mahabbat sýsyny» komedııalyq operasy festıvalge jeńildik pen romantıkalyq kóńil kúı syılady. P. Chaıkovskııdiń «Evgenıı Onegın» operasy reseılik Eleonora Makarova men Evgenıı Kachýrovskııdiń, sondaı-aq tájikstandyq Shohrýh ıÝnýsovtyń qatysýymen ótti.
Festıvaldiń mańyzdy bóliginde Italııadan shaqyrylǵan opera juldyzdary óner kórsetti: Dezıre Rankatore (soprano), Chelso Albelo (tenor), Djýlıo Pellıgra (tenor), Alberto Gazale (barıton).
– Men ıtalıandyq Operanyń «Travıata», «Rıgoletto» jáne «Bogema» shedevrlerin oryndadym. Búgin qazaqstandyq tyńdarmandarǵa án shyrqaǵanyma óte qýanyshtymyn, kórermender bizdiń qoıylymdarymyzǵa rıza boldy dep senemin. Al Eýropalyq kórermender jaıly aıtatyn bolsaq, ásirese Germanııa, Frantsııa Avstrııa, Italııa sııaqty elderde tamasha operaǵa kelýdi, ánshilermen birge sol oqıǵada qalýdy, keremet kostıýmder men umytylmas mýzykany tyńdaǵandy jaqsy kóredi,- deıdi Italııalyq tenor Djýlıo Pellıgra.
Festıvalde Qazaqstannyń opera ónerin joǵary deńgeıde kórsetetin «Astana Opera» teatrynyń hory jáne sımfonııalyq orkestri de óner kórsetti.
Festıvaldiń mýzykalyq baǵdarlamasyn Djýzeppe Akýavıva (Italııa) daıyndady ári dırıjeri de ózi. Bas hormeıster – Qazaqstannyń eńbek sińirgen qaıratkeri Erjan Dáýitov.
«Operalııa-2024» festıvali – Qazaqstannyń mádenı ómirindegi mańyzdy oqıǵa. Álemniń ár túkpirinen kelgen opera sheberleriniń qatysýy sharanyń mańyzdylyǵyn arttyra tústi.
Kamıla Múlik
