Operatsııalyq medbıke bolý árkimniń qolynan kelmeıtin kúrdeli mamandyq – Arzýgýl Haırýllaeva
ALMATY. QazAqparat - 12 mamyr – Halyqaralyq medbıkeler kúni. Medbıkelerdiń jumysy adaldyqtyń, meıirimdiliktiń, kásipqoılyqtyń mysaly bolyp tabylady. Almaty qalasy № 4 perzenthanasynda dál osyndaı medbıkeler jumys isteıdi. Solardyń biri perzenthananyń operatsııalyq medbıkesi Arzýgýl Haırýllaeva. Búgingi kásibı merekege oraı medbıke óz jumysynyń qyr syry týraly aıtyp berdi.
Arzýgýl Haırýllaeva óz mamandyǵy boıynsha 23 jyl jumys istep keledi. Sońǵy 7-8 jyl ishinde akýsher–gınekologterge operatsııa kezinde kómektesip, kún saıyn ómirge jańa kelgen nárestelerdi kórip júrgen jan. Operatsııalyq blokta medbıke dárigerlerdiń taptyrmas kómekshisi. Olar patsıentterdi operatsııaǵa daıyndaıdy jáne operatsııa kezinde dárigermen birdeı ıin tirese eńbek etedi.
«Operatsııalyq medbıke – bul hırýrgııalyq toptyń barlyq múshelerin baılanystyratyn býyn. Ol búkil operatsııanyń barysyn bilip qana qoımaı, hırýrgke qaı ýaqytta qandaı qural berý kerektigin túsinýi kerek. Kúrdeli operatsııalar kóbinese tolyq tynyshtyqta ótedi. Hırýrg oǵan quraldardyń ishinen ne qajet ekenin áli aıtpasa da, meıirbıkeniń bilip bergen kezderi de bolady. Medbıkeniń kásibıligi shuǵyl jaǵdaılarda óte mańyzdy, ol kezde barlyq jaǵdaıdy baǵalaý jáne operatsııaǵa daıyndaý úshin birneshe sekýndtar jetkilikti bolýy múmkin. Operbloktyń mamany bolý árkimniń qolynan kele bermeıdi. Bul qıyn jumys, biraq ol júrektiń qalaýymen tańdalatyn mamandyq. Sonymen qatar, hırýrgııalyq toptyń quramyndaǵy jaýapkershiliktiń aýyrlyǵyn naqty bilý qajet. Bul qyzmetke keletinder kóp, biraq bári birdeı psıhoemotsıonaldy jáne fızıkalyq belsendilikke tótep bere bermeıdi. Bizdiń jumysymyz tepe-teńdikti, emotsııalardy ustaı bilýdi, sondaı-aq, josparly operatsııalardan shuǵyl operatsııalarǵa aýysý qabiletin talap etedi. Al perzenthanada jumys istegende, bul eki adamnyń, ıaǵnı, ana men balanyń ómiri seniń jaýapkershiligińde bolady», - deıdi Arzýgýl HaıHaırýllaev
Operatsııa jasaıtyn medbıke kúnine 3 hırýrgııalyq aralasýǵa qatysady. Ol operatsııa ótetin bólmeni óńdep daıyndaıdy, naýqasty operatsııaǵa daıyndaıdy, onyń operatsııa bólmesine ýaqytynda jetkizilýin, sondaı-aq, sterıldilik aımaqtaryna sáıkes hırýrgııalyq top músheleriniń qozǵalysyn qadaǵalaıdy. Ol naýqasqa operatsııadan keıingi erte kútim jasaıdy, sonymen qatar, operatsııadan keıingi asqynýlardyń bolmaýyn qadaǵalaıdy.
Arzýgýl Haırýllaevanyń aıtýynsha, medbıke shuǵyl jaǵdaılarda alǵashqy medıtsınalyq kómek kórsetýge árqashan daıyn bolýy kerek.
«Biz aldaǵy táýlikte qandaı operatsııalar bolatynyn bilmeı, aýysymǵa baramyz. Munda nemquraıdylyq pen qatelikke jol berilmeıdi. Operatsııanyń nátıjesi hırýrg pen reanımatologtiń áreketine ǵana baılanysty emes. Barlyq operatsııalyq medbıkelerdi merekemen shyn júrekten quttyqtaımyn. Amandyq, densaýlyq jáne kásibı ósýdi tileımin», - dedi Arzýgýl Haırýllaeva.
