Opera ánshisi Áıgerim Altynbek Italııadaǵy halyqaralyq baıqaýdyń fınalyna ótti

ASTANA. KAZINFORM – Áıgerim Altynbek XI Halyqaralyq opera ánshilerine arnalǵan Portofıno baıqaýynda fınalǵa ótti. Atalǵan baıqaý 2025 jyldyń 22–27 shilde aralyǵynda Italııada ótip jatyr.

QR Mádenıet jáne aqparat mınıstrligi baspasóz qyzmetiniń málimetinshe, CLIP baıqaýy alǵash ret 2015 jyly uıymdastyrylyp, 32 jasqa deıingi opera ánshileri úshin eń bedeldi halyqaralyq dodalardyń birine aınaldy. Qazylar alqasynyń quramynda Mılan qalasyndaǵy «La Scala», Monte-Karlodaǵy Opera, Býenos-Aırestegi Kolon teatry, Madrıdtegi Korol teatry, Vısbaden memlekettik teatry syndy tanymal teatr basshylary bar.

Qatysýshylar birneshe kezeńnen ótedi. Eń áýeli qatysýshylar aldyn ala tyńdaýdan ótedi. Keıin orkestrdiń súıemeldeýimen Piazzetta di Portofino dep atalatyn Portofınonyń ortalyq alańynda ótetin fınalǵa qatysady. Bul is-shara gala-kontsertpen aıaqtalady.

Áıgerim Altynbek álemniń 50-ge jýyq elinen kelgen 92 qatysýshyny basyp ozyp, klassıkalyq vokal ónerinde Qazaqstannyń ornyn aıshyqtap berdi.

Aıta keteıik, Áıgerim Altynbek kóptegen halyqaralyq baıqaýlardyń laýreaty atanǵan. Buǵan deıin ol Italııada ótken opera ánshileri baıqaýynyń jeńimpazdary qatarynan kórinip, Modena qalasynda (Italııa) ótken Nıkolaı Gıaýrov atyndaǵy halyqaralyq opera baıqaýynda úshinshi oryndy ıelendi.

Sonymen qatar ol áıgili Italıa opera ánshisi Mırella Frenı atyndaǵy arnaıy marapatty jeńip aldy. Sonymen qatar ánshi áıgili «La Skala» teatrynyń jastar baǵdarlamasyna qatysty jáne aldaǵy eki jyl boıy sol jerde bilim alady.

Al maýsym aıynda ol álemdik opera juldyzdary Hose Karreras jáne Andrea Bochellımen birge bir sahnada óner kórsetti.

Áıgerim Altynbek Jibek Joly arnasynyń «Búgin LIVE» stýdııasyna qonaq boldy.