Opera ánshisi Áıgerim Altynbek estrada men klassıkanyń basty aıyrmashylyǵyn atady

ASTANA. KAZINFORM – Búginde Italııanyń Arrıgo Boıto atyndaǵy Parma konservatorııasynda bilimin jetildirip jatqan otandyq opera ánshisi Áıgerim Altynbek estrada men klassıka janrlarynyń basty aıyrmashylyǵyn atady.

Kazinform agenttigine bergen suhbatynda ol jas opera ánshilerine keńes berdi.

- Eń birinshi minez, tabandylyq kerek. Óıtkeni, óner joly óte qıyn. Opera - óte qıyn baǵyttardyń biri. Bir ǵana emes birneshe tildi qatar meńgerýiń jáne qazaq shyǵarmalaryn ǵana emes, shetel shyǵarmalaryn óz deńgeıinde oryndaı bilýiń qajet. Al onyń bári bilimniń arqasynda keledi. Erinshektikti umytý, kúndiz-túni daıyndalý, izdený kerek. Fızıologııańdy qatty tekserý qajet. Óıtkeni, sahnaǵa shyqqan kezde qorqynyshtan daýys shyqpaı qalýy nemese psıhologııalyq turǵyda qıyn bolýy múmkin. Ondaı nárseler bolady. Sonyń bárine daıyn bolýy kerek, - dedi ol.

Daryndy opera ánshisi ókinishke qaraı kópshilik estrada men klassıkany salystyryp jatatyndyǵyn aıtady. 

- Qazaqstanda klassıka men estradanyń aıyrmashylyǵyn bilmeı jatady. Ekeýi eki túrli janr. Sózdiń shyny kerek, seniń tamaǵyń aýyryp, kóńil-kúıiń bolmaı tursa, estrada ánin fonogrammamen aıtyp shyǵýǵa bolady. Al klassıkada 39 gradýs temperatýramen bolsań da, kóńil-kúıiń bolmasa da barlyǵyn tiri, jandy daýysta aıtasyń. Daýsymyz kóńil-kúıimizge de baılanysty ózgerip turady, - dedi Áıgerim Altynbek.

Aıta keteıik, opera ánshisi Áıgerim Altynbek bir adamdy kýmırim dep aıta almaıtynyn málimdegen.