Opera ánshisi Áıgerim Altynbek CLIP 2025 baıqaýynyń jeńimpazy atandy
ASTANA. KAZINFORM — Qazaqstandyq opera ánshisi Áıgerim Altynbek XI Halyqaralyq CLIP 2025 opera baıqaýynda jeńiske jetti. Ónerpaz birinshi orynnan bólek, baıqaýdyń negizgi nomınatsııalarynda úzdik atanyp, absolıýtti jeńimpaz boldy. Bul týraly QR Mádenıet jáne aqparat mınıstrliginiń baspasóz qyzmeti málim etti.
Sonymen qatar kórermen kózaıymy júldesin, «Úzdik áıel daýysy» marapatyn jáne mýzyka synshysy, art-dırektor ári pedagog Karlo Maıerdyń arnaıy júldesin ıelendi.
Bul — el mádenıetindegi tarıhı jeńis. Baıqaýda alǵash ret Ortalyq Azııa ókili osyndaı jetistikke jetip, kóshbasshylar qatarynan kórindi.
— Baıqaý tarıhynda birinshi ret Áıgerim Altynbek saıystyń basynan barlyq qazylar alqasynyń reıtınginde birinshi turdy. Bul — óte sırek kezdesetin jaǵdaı. Bul kórermenniń de tańdaýy durys bolǵanyn dáleldeıdi, — dedi qazylar alqasynyń tóraǵasy Domınık Meıer.
Bıylǵy baıqaýǵa álemniń túkpir-túkpirinen 200-ge jýyq ótinim túsken. Biraq fınalǵa nebári 10 oryndaýshy ótti. Olar Portofıno qalasynyń ortalyq alańynda Teatro Carlo Felice orkestriniń súıemeldeýimen ótken gala-kontsertte óner kórsetti.
«Úzdik áıel daýysy» júldesin Áıgerimge Chılıdegi Ibanes-Atkınson qory tabystady. Bul qor — álem boıynsha jas, daryndy vokalısterdi izdep, qoldaýmen aınalysatyn halyqaralyq uıym. Qor jetekshi teatrlarmen áriptestik ornatqan jáne Santıagodaǵy opera teatrymen birlesken jastar baǵdarlamasyn júzege asyrady.
Áıgerim — bul qordyń Ońtústik Amerıka kontınentindegi qoldaýyna ıe bolǵan alǵashqy eýropalyq emes ánshi. Oǵan kásibı jáne bolashaq yntymaqtastyq boıynsha usynys jasaldy. Bul usynys otandyq ónerpazǵa Eýropadan tys jerlerde de halyqaralyq mansabyn keńeıtýge múmkindik beredi.
Áıgerim Altynbektiń bul jetistigi búkil el úshin serpilis boldy. Óte joǵary básekelestikke qaramastan, ol qazaqstandyq vokal mektebiniń álemdik deńgeıdegi talaptarǵa saı kelip, bıik meje qoıa alatynyn dáleldedi.
Eske sala keteıik, Concorso Lirico Internazionale di Portofino (CLIP) — jyl saıyn Italııanyń Portofıno qalasynda ótetin, álemdegi eń bedeldi vokaldyq baıqaýlardyń biri. Konkýrstyń qazylar alqasy quramynda Eýropanyń jetekshi opera teatrlary Vena operasy, La Skala, Glaındborn, Metropolıten jáne Elıseı alańyndaǵy teatrdyń rejısserleri men dırektorlary bar.
Qazaqstan Respýblıkasynyń Mádenıet jáne aqparat mınıstrligi Áıgerimdi jarqyn jeńisimen quttyqtaıdy. Bul jeńis — el mádenıetiniń jahandyq deńgeıde tanylyp kele jatqanynyń aıqyn dáleli.
Aıta keteıik, Áıgerim Altynbek álemniń 50-ge jýyq elinen kelgen 92 qatysýshyny basyp ozyp, klassıkalyq vokal ónerinde fınalǵa shyqqan bolatyn.
Baıqaýǵa qatysýshylar birneshe kezeńnen ótken. Eń áýeli qatysýshylar aldyn ala tyńdaýdan ótedi. Keıin orkestrdiń súıemeldeýimen Piazzetta di Portofino dep atalatyn Portofınonyń ortalyq alańynda ótetin fınalǵa qatysqan bolatyn.